Səfir: "Fransanın yeni Prezidenti Dağlıq Qarabağ münaqişəsinə böyük diqqət ayırır"
Azərbaycan - Fransa əlaqələrinin inkişafı və şaxələnməsinin davam etdiyi bir dövrdə Emanuel Makron Fransa Prezidenti seçilib. Respublikanın yeni Prezidenti bütün sahələrdə bu dinamizmin davam etməsində şəxsən maraqlıdır.
Bunu 1news.az-a açıqlamasında Fransanın Azərbaycandakı səfiri Aureliya Buşez deyib.
Onun sözlərinə görə, yüksək səviyyədə siyasi dialoqun səmimi və sıx olması, iqtisadi mübadilələrin inkişafı, Fransa-Azərbaycan Universitetinin yaranması və ya desentralizasiya əməkdaşlığı ilə bağlı pilot komitənin yaranması və digər nailiyyətlər əsasında Fransa höküməti yaxın aylarda və illərdə çalışacaq ki, iki ölkə arasında partnyorluq əlaqəsi möhkəmlənsin.
Səfir Makronun prezidentliyi dövründə rəsmi Parisin münaqişənin həlli ilə bağlı mövqeyində nə kimi dəyişikliklərin olacağına dair sualı da cavablandırıb:
“Əlbəttə ki, Fransa Respublikasının yeni Prezidenti Dağlıq Qarabağ münaqişəsinə, eləcə də regionun digər məsələlərinə böyük diqqət ayırır. Fransanın ATƏT- in Minsk qrupunun həmsədri roluna balanslı və qərəzsizlik ruhunda tam şəkildə riayət olunmasında Emanuel Makron hər zaman qətiyyətli olub. Qəbul olunan qarşılıqlı kompromisə doğru irəliləmək üçün amerikalı və rus həmkarları ilə birgə Fransa yaxın aylarda tam gücü ilə işləməyə hazırdır”.
Pərvanə Sultanova
