“İnsan Hüquqları XXI əsr – Azərbaycan” Fondu yeni layihənin icrasına başlayır
“İnsan Hüquqları XXI əsr – Azərbaycan” Fondu Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurasının maliyyə dəstəyi ilə Müharibədə itkin düşmüş şəxslərin Bakı şəhərində yaşayan və psixoloji yardıma ehtiyacı olan ailələri üçün psixoloji xidmətlərin göstərilməsi layihəsinin icrasına başlayıb.
1news.az-a Fonddan verilən xəbərə görə, layihənin əsas məqsədi vətənin azadlığı və bütövlüyü uğrunda gedən döyüşlərdə itkin düşmüş şəxslərin ailələrinə unudulmadıqları mesajını vermək, dövlətimizin bu sahədə apardığı ardıcıl və məntiqli siyasətə ictimai dəstəklə yanaşı, gənc nəslin dövlətçilik ruhunda tərbiyəsinə kömək etməkdən etməkdir.
Layihə çərçivəsində ümumilikdə 200-ə yaxın itkin düşmüş şəxsin ailə üzvlərinə psixoloji yardım göstərilməsi nəzərdə tutulub. Bu məqsədlə yaradılacaq "ETİMAD XƏTTİ" vasitəsilə onların problemləri daha dərindən araşdırılacaq.
Qeyd edək ki, “İnsan Hüquqları XXI əsr – Azərbaycan” Fondu 2011, 2012 və 2013, 2014-cü illərdə Beynəlxalq Qırmızı Xaç Komitəsi və Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurası ilə Bakı şəhərinin rayonlarında yaşayan müharibədə itkin düşmüş şəxslərin ailələrinin hüquqi, psixo-sosial çətinliklərinin azaldılması məqsədi əməkdaşlıq etmiş, həmçinin bu məqsədlə “İtkin Düşmüş Şəxslərin Ailələrinin Psixo-Sosial Reabilitasiyası Mərkəzi” yaradılıb.
S.Xankişiyeva
