Hindistan məşhur “Indian Ocean” musiqi qrupu Bakıya gəlir
Hindistanın tanınmış musiqi qruplarından hesab olunan “Indian Ocean” qrupu 10-14 sentyabr, 2017-ci il tarixlərində Azərbaycana səfər edəcək.
1news.az-a Hindistan səfirliyindən verilən məlumata görə, qrup 11 sentyabrda, saat 19:00-da Bakı şəhərində Dənizkənarı Bulvarda və 13 sentyabrda, saat 19:00-da Sumqayıt Dənizkənarı Bulvarında canlı musiqi proqramları ilə çıxış edəcəklər. Konsertlərə giriş sərbəst olacaqdır.
“Indian Ocean” qrupu öz nadir musiqisi ilə Hindistanda və ölkə xaricində böyük coşqu yaratmış və uğur qazanmışdır. Bəzi tənqidçilər “Indian Ocean”qrupunun musiqisini mənəviyyat, fəallıq, ətrafmühitçilik, müharibənin faydasızlığı və mifologiya kimi mövzuları özündə ehtiva edən müasir rokun, klassik Hind cazının, xalq musiqisinin vəhdəti kimi təsvir edirlər.
“Indian Ocean” musiqi qrupunun səfəri Hindistan Respublikası ilə Azərbaycan Respublikası arasında diplomatik münasibətlərin qurulmasının 25-ci ildönümünə həsr olunmuş tədbirlərin tərkib hissəsini təşkil edir. Tədbirin təşkilatçıları olan Hindistanın Mədəni Əlaqələr Şurası (ICCR) və Hindistanın Azərbaycandakı Assosiasiyası (IAA) Azərbaycan musiqi sevərlərini hər kəsə açıq olan konsert proqramlarından zövq almağa dəvət edirlər.
P.Sultanova
