Belarus azərbaycanlıları xarici mediada Azərbaycan haqqında yazılanlara etiraz edib
Belarusda fəaliyyət göstərən Azərbaycan İcmaları Konqresi xarici mediada Azərbaycan haqqinda yayılmış materallarla bağlı bəyanat yayaraq narahatlığını və etirazını bildirib.
1news.az-a Diasporla İş üzrə Dövlət Komitəsindən verilən xəbərə görə, bəyanatda deyilir:
“The Organized Crime and Corruption Reporting Project” təşkilatının hesabatı əsasında Azərbaycanın əleyhinə hazırlanmış və “Washington Post”, “The Guardian”, eləcə də digər Avropa qəzetlərində dərc olunmuş yazılar qərəzli xarakter daşıyır.
Məlumdur ki, bu yazıların arxasında Azərbaycana və onun rəhbərliyinə qarşı çıxan beynəlxalq aləmdə fırıldaqçı, yalançı, saxtakar imici ilə tanınmış Corc Soros və onunla birgə fəaliyyət göstərən, Azərbaycan əleyhinə çirkin kampaniya aparan erməni lobbisi dayanır. Azərbaycan əleyhinə olan bu qüvvələrin cəhdləri heç bir nəticə verməyib.
“The Guardian” qəzetindəki məqalənin müəlliflərindən birinin erməni Dina Naqapetyan olması bir daha bu iftiraların ermənipərəst qüvvələrin növbəti iyrənc əməli olduğunu sübut edir”.
Belarus azərbaycanlıları icması Azərbaycan Prezidenti İlham Əliyevin uğurlu daxili və xarici siyasətini dəstəklədiyini bəyan edərək bildirir ki, ölkəmizin uğurlarını beynəlxalq aləmdə kiçiltməyə çalışan siyasi qüvvələrlə mübarizədə səylərini əsirgəməyəcəklər.
S.Xankişiyeva
