Rövşən Rzayev: Dövlətimizin başçısı BMT-dəki çıxışında qətiyyətli və prinsipial mövqe nümayiş etdirdi
Sentyabrın 20-də Azərbaycan Prezidenti İlham Əliyev BMT-nin Baş Assambleyasının 72-ci sessiyasının açılışında çıxışı zamanı birmənalı olaraq prinsipial mövqeyini nümayiş etdirdi. Azərbaycanın inkişafının sürətlə davam etdiyini diqqətə çatdırdı.
1news.az-ın AZƏRTAC-a istinadla verdiyi xəbərə görə, bu fikirləri Milli Məclisin hüquq siyasəti və dövlət quruculuğu komitəsinin sədr müavini Rövşən Rzayev səsləndirib.
Rövşən Rzayev qeyd edib ki, Azərbaycanın hazırda böyük bir problemi var, dövlətimizin ərazi bütövlüyü pozulub, torpaqlarımızın işğaldan azad olunması barədə Prezident İlham Əliyev BMT-nin dörd qətnaməsini bir daha onların yadına saldı. Açıq şəkildə bildirdi ki, digər dövlətlərlə bağlı qətnamələr dərhal yerinə yetirilir, Azərbaycanla bağlı qətnamələr isə yerinə yetirilmir, çünki bununla bağlı ikili standartlar mövcuddur.
“Bu, sessiyada Azərbaycanla bağlı çox vacib mesajlar idi. Bundan sonra dünya ictimaiyyəti, aparıcı dövlətlər, Minsk qrupunun həmsədrləri həmin mövqeyə öz yanaşmalarını səsləndirməlidirlər. Digər tərəfdən isə dövlətimizin başçısı bir daha dünya ictimaiyyətinə çatdırdı ki, Xocalı soyqırımının təşkilatçısı və birbaşa iştirakçısı bu gün Ermənistana rəhbərlik edən Serj Sarkisyandır. Bunu BMT tribunasından demək təbii ki, çox vacib idi.
Dövlətimizin marağından çıxış edən Prezident İlham Əliyev sessiya iştirakçılarını Azərbaycanın inkişafını təmin edən siyasət barədə məlumatlandırdı. Mən də Azərbaycan xalqı ilə bərabər dövlətimizin başçısının qətiyyətli çıxışına və prinsipial mövqeyinə görə qürur hissi keçirirəm”, - deyə Milli Məclisin deputatı vurğulayıb.
S.Xankişiyeva
