Bahar Muradova: Bizə dialoq xatirinə dialoq yox, onun məhsuldarlığı lazımdır
Dünən və bu gün həmkarlarımızın məruzələrini, hesabatlarını və çıxışlarını dinləmək imkanımız olub. Onlar bizim nailiyyətlərimizi və uğursuzluqlarımızı qeyd ediblər. Lakin təhdidlər və yeni çağırışlar barədə daha çox danışıblar.
1news.az-ın AZƏRTAC-a istinadla verdiyi xəbərə görə, bu fikirləri Milli Məclis sədrinin müavini, ATƏT Parlament Assambleyasında Azərbaycan nümayəndə heyətinin rəhbəri Bahar Muradova Assambleyanın Andorrada keçirilən sessiyası çərçivəsində daimi komitənin iclasında növbəti çıxışı zamanı səsləndirib.
Təqdim edilən məruzədə əksini tapan işlərə görə ATƏT PA-nın baş katibi Roberto Montellaya və Katibliyin üzvlərinə təşəkkür edən Bahar Muradova deyib: “Katibliyin uğurlu işi həm də bizim uğurumuzdur”.
Azərbaycan nümayəndə heyətinin rəhbəri çıxışlarda mövcud münaqişələrin və münaqişə zonalarında proseslərin kəskinləşməsinin təhlükəsizliyə və sessiyada müzakirə olunan əməkdaşlıq perspektivlərinə təhlükə yaratmaqda davam etməsinin vurğulandığını diqqətə çatdırıb.
“Bildiyiniz kimi, bu yaxınlarda BMT Baş Assambleyasında dünyanın müxtəlif guşələrində mövcud olan münaqişələrə də toxunulub. Azərbaycan Prezidentinin çıxışında Ermənistan-Azərbaycan, Dağlıq Qarabağ münaqişəsinə dair mövqe ifadə edilib və onun beynəlxalq hüquqa müvafiq və beynəlxalq təşkilatların müxtəlif sənədlərində əksini tapan həll yolları göstərilib. Həmçinin xarici işlər nazirləri və Minsk qrupunun həmsədrləri səviyyəsində görüş keçirilib, həmsədrlərin bu ilin oktyabrında regiona səfəri ilə bağlı razılıq əldə edilib. Bu səfərin yekunu olaraq, prezidentlərin qarşıdakı görüşünə böyük ümid bəsləyirik”, - deyə Bahar Muradova qeyd edib.
O vurğulayıb ki, dövlətlərin ərazi bütövlüyünün pozulması problemlərinin və dünyanın siyasi xəritəsində yeni qurumların yaradılma cəhdlərinin getdikcə daha çox baş verdiyi dövrdə bu cür tədbirlərin əhəmiyyəti artır. Buna görə də parlament çərçivəsində yeni ideya və formatların hazırlanmasına, özünü doğrultmayan mexanizmlərin əvəzlənməsinə bütün qüvvə ilə çalışmaq lazımdır. Təbii ki, Assambleyada da mövcud mexanizmlərin səmərəliliyinin artırılmasına nail olmaq çox önəmlidir.
ATƏT Parlament Assambleyası sədrinin sessiyanın açılışındakı çıxışını xatırladan Bahar Muradova deyib:
“Kristin Muttonenin qeyd etdiyi kimi, təəssüf ki, biz proseslərə heç də həmişə lazımi reaksiya verməmişik. Bundan başqa, qarşılıqlı etimadın olmaması bizim irəli getməyimizə mane olurdu. Ən mühüm məsələlərin həlli üçün ümumi yol tapılması kimi problemimiz var. Düşünürəm ki, bütün bunlar bizə səlahiyyətlərimiz çərçivəsində daha geniş fəaliyyət göstərməkdə maneçilik törədir. Bəzən biz öz mandatımızdan tam şəkildə və lazımi tərzdə istifadə etmək imkanından məhrum olmuşuq. Axı, bizə dialoq xatirinə dialoq yox, onun məhsuldarlığı lazımdır. Əks halda inamsızlıq yaranır və biz hətta birgə səylərimiz müqabilində də müsbət nəticələrə nail ola bilmirik. Buna görə də biz Assambleyanın imkanlarından bəhrələnməliyik ki, hamımız üçün təhlükə doğuran mövcud vəziyyətin gərginləşməsinin qarşısını alaq”.
Bir daha yüksək səviyyədə dialoqa, o cümlədən Ermənistan-Azərbaycan, Dağlıq Qarabağ münaqişəsinin həlli üzrə dialoqa toxunan Bahar Muradova çıxışını bu fikirlərlə yekunlaşdırıb: “Biz parlamentin üzvü olaraq öz xüsusi nümayəndələrimiz və xüsusi komitələrimizlə birgə qarşılıqlı etimadın təmin edilməsi, şəffaflıq və hesabatlılıq yolu ilə bu prosesə öz töhfəmizi verməliyik”, - deyə Bahar Muradova vurğulayıb.
S.Xankişiyeva
