“Neftçi”yə qalib gələn “AzNar” komandası “Nar kuboku”na sahib olub – FOTO

Mədəniyyət və Turizm Nazirliyinin, Göyçay Rayon İcra Hakimiyyətinin təşkilatçılığı, “AzNar” QSC-nin maliyyə dəstəyi ilə keçirilən XII Nar festivalı noyabrın 4-də başa çatıb. Festivalın ikinci günü Göyçay şəhər stadionunda “AzNar” və “Neftçi” futbol komandaları arasında “Nar kuboku” uğrunda oyun keçirilib.

1news.az-ın AZƏRTAC-a istinadla verdiyi xəbərə görə, oyundan öncə “AzNar” QSC tərəfindən əsaslı şəkildə yenidən qurulan Göyçay şəhər stadionunun açılış mərasimi olub.

Tədbirdə rayon icra hakimiyyətinin başçısı Mehdi Səlimzadə, “AzNar” QSC-nin sahibi, Rusiyada yaşayan azərbaycanlı iş adamı Fərhad Əhmədov, Milli Məclisin deputatı Sabir Hacıyev iştirak edib. Məlumat verilib ki, 1976-cı ildə istifadəyə verilmiş Göyçay şəhər stadionu 40 ildən sonra yenidən əsaslı təmir edilib. Ümumi ərazisi 6 hektar olan stadionda 2500 ədəd yeni oturacaq quraşdırılıb, 380 kvadratmetr sahəyə yaşıl ot örtüyü salınıb. Stadionun giriş qapıları müasir qapılarla əvəzlənib, yeni monitor quraşdırılıb.

Həmçinin ərazidə ilk dəfə olaraq voleybol, basketbol, minifutbol meydançaları inşa edilib. Stadion əsaslı təmirdən sonra “AzNar” futbol komandasının ixtiyarına verilib. Bir il öncə fəaliyyətə başlayan “AzNar” komandası Azərbaycan Futbol Federasiyaları Assosiasiyasının (AFFA) dəstəyi ilə təşkil olunan Həvəskarlar Liqasındakı ev oyunlarını bu stadionda keçirib.

Sonra qonaqlar “AzNar” İdman Klubunun zalında məşq edən yeniyetmə güləşçilər, boksçular və qaydasız döyüşçülərin nümunəvi çıxışlarına baxıblar.

Stadionun açılış mərasimindən sonra “AzNar” və “Neftçi” komandaları arasında “Nar kuboku” uğrunda oyuna start verilib. Oyun “AzNar”ın 4:1 hesablı qələbəsi ilə başa çatıb.

Yarışı 5 minə yaxın azarkeş izləyib.

İş adamı Fərhad Əhmədov sonda “AzNar”ın oyunçuları ilə görüşərək onları qələbə münasibətilə təbrik edib, komandaya “Nar kuboku” və 10 min manat pul mükafatı təqdim edib.

S.Xankişiyeva