Vaşinqtonda Heydər Əliyevin xatirəsi anılıb – FOTO
Azərbaycan Respublikasının ABŞ-dakı Səfirliyində Ümummilli lider Heydər Əliyevin xatirəsinə həsr olunmuş tədbir keçirilib.
1news.az-a Səfirlikdən verilən xəbərə görə, tədbirə ABŞ ictimaiyyətinin nümayəndələri, ABŞ-da yaşayan həmyerlilərimiz və Səfirliyin əməkdaşları ilə yanaşı Xocalı faciəsinə həsr olunmuş “Sülh laylayı” (The Lulluby of Peace) adlı musiqi əsərinin hazırlanmasında iştirak etmiş Vaşinqton Beynəlxalq Piano Sənəti Şurasının çoxsaylı nümayəndələri qatılıblar.
Tədbiri giriş nitqi ilə açan səfir Elin Süleymanov Ümummilli liderin Azərbaycanın inkişafı və xalqımızın rifahında rolu, göstərdiyi misilsiz xidmətlərindən bəhs etmişdir. Azərbaycan dövlətçiliyinin qurulmasında müstəsna xidmətləri olan Ümummilli lider Heydər Əliyevin uzaqgörən siyasəti, müdrik və qətiyyətli addımları nəticəsində ölkənin hərtərəfli inkişafına nail olunduğu qeyd edilmişdir. Müasir Azərbaycan dövlətinin banisi olan Ulu öndərin qətiyyətli mövqeyinin və uzaqgörənliyinin nəticəsi olaraq Azərbaycanın irimiqyaslı tarixi layihələrə imza atdığı bildirilib.
Azərbaycan xalqının Ümummilli Lideri Heydər Əliyevin anım günü çərçivəsində ABŞ-ın Merilend ştatının Qida Bankına Azərbaycan tərəfindən ianə edilmişdir. Merilend Qida Bankının Prezidenti Karmen Del Qersio və Hökumətlə Əlaqələr üzrə Direktoru Nensi Smitlə Səfirlikdə keçirilən görüş zamanı səfir Elin Süleymanov ümummilli lider Heydər Əliyevin bir neçə dəfə Merilənd ştatına səfər etməsindən bəhs etmiş və dahi liderin sayəsində Azərbaycan-ABŞ münasibətlərinin inkişaf edərək strateji önəm almasını vurğulamışdır. Səfir ümummilli liderin siyasətini davam etdirən Azərbaycan rəhbərliyi tərəfindən aparılan uğurlu siyasət nəticəsində ölkə əhalisinin yaşayış səviyyəsinin yaxşılaşması, həmçinin yoxsulluq səviyyəsinin kəskin dərəcədə azalmasından bəhs edib.
Merilend Qida Bankının prezidenti K.Qersio Azərbaycanın Ümummilli lideri Heydər Əliyevin anım günü ilə bağlı Merilend Qida Bankına ölkəmizin yardımının artıq çox gözəl bir ənənəyə çevrildiyini qeyd etmiş və buna görə Azərbaycan tərəfinə dərin minnətdarlığını bildirmişdir. O, həmçinin Ümummilli lider Heydər Əliyevin əziz xatirəsi ilə bağlı yaranmış əməkdaşlığın Azərbaycanla Merilənd ştatı arasında bağların daha da möhkəmlənməsinə səbəb olduğunu qeyd etmişdir. N.Smit 1979-cu ildən fəaliyyət göstərən Merilend Qida Bankının vasitəsilə hər il ehtiyacı olan yüz minlərlə amerikalıya qida məhsullarının paylanıldığını qeyd etmiş və bu il Azərbaycan tərəfindən edilən töhfə nəticəsində qarşıdan gələn milad və yeni il bayramları ərəfəsində on beş min ehtiyacı olan insanın yeməklə təmin olunacağını vurğulanıb.
Bundan başqa, Səfirliyin təşkilatçılığı ilə 8 dekabr 2017-ci il tarixində Vaşinqton şəhərində yerləşən İslam Mərkəzində cümə namazı zamanı Ümummilli lider Heydər Əliyevin ruhuna dualar oxunmuş və ona Allahdan rəhmət dilənmişdir. İslam Mərkəzinin direktoru doktor Abdulla Xuc iştirak edənlərə Ümummilli lider Heydər Əliyevin həyat və fəaliyyəti, Azərbaycan xalqının tarixində oynadığı misilsiz rolu barədə məlumat vermişdir. Cümə namazının ardından təşkil edilən ehsan süfrəsində 300 nəfər iştirak edib.
S.Xankişiyeva
