Meksika və Azərbaycan təhsil sahəsində əməkdaşlığı müzakirə edib
Meksikanın Azərbaycandakı səfiri Rodriqo Labardini təhsil naziri vəzifəsini icra edən Ceyhun Bayramovla görüşüb.
1news.az-a səfirlikdən verilən məlumata görə, görüşdə təhsil sahəsində əməkdaşlıq perspektivləri müzakirə edilib.
Tərəflər keçən ilin oktyabr ayında imzalanmış təhsil, elm, gənclər, mədəniyyət və idman sahələrində əməkdaşlığa dair hökümətlərarası sazişin hər iki ölkə arasında qeyd olunan sahələr üzrə əlaqələrin inkişafına töhfəsini vurğulayıblar.
Xüsusilə turizm və energetika sektorları ilə bağlı öyrənilən sahələrdə qarşılıqlı marağı şərh edərək səfir Labardini qeyd edib ki, bu günə kimi Meksika ilə Azərbaycanın müxtəlif universitetləri arasında əməkdaşlıq əlaqələri artıq qurulmuşdur. Bu baxımdan, təhsil və peşə tərcübələrinin mübadiləsi hər iki tərəfin xeyrinədir.
Bundan əlavə, beynəlxalq tədbirlər çərçivəsində təhsil sektorunun təmsilçiləri arasında mümkün görüş, eyni zamanda, Meksika ilə Azərbaycanda xarici tələbələrə təqdim olunan müxtəlif imkanlar haqqında danışılıb.
Səfir Labardini, öz növbəsində, Meksikada təhsilin yeniliklərinə diqqət yetirib və hazırkı təhsil islahatının məqsədləri haqqında məlumat verib. Eyni zamanda ölkəsində təqaüd proqramlarına aid bəzi məsələlərə aydınlıq gətirib. Qeyd edib ki, Meksika təhsil islahatı sayəsində savadlılığın inkişafına mane olan elementlərin aradan qaldırılması mümkün oldu. Bununla da, bu gün Meksikada 900 min tələbə texnologiya sahəsi üzrə ali təhsil almaqdadır.
Görüşün sonunda hər iki tərəf təhsil sektorunda əməkdaşlığın gücləndirilməsini davam etdirməyə dair istəklərini ifadə ediblər.
P.Sultanova