Avropa İttifaqının Bakı Limanı ilə bağlı layihəsinin açılış mərasimi keçirilib
Bu gün “Ələtdə yerləşən yeni Bakı Limanı və Azad Ticarət Zonasının əməliyyat imkanlarının genişləndirilməsinə Avropa İttifaqının” dəstəyi” layihəsinin açılış mərasimi keçirilib.
1news.az xəbər verir ki, Aİ tərəfindən maliyyələşdirilən layihə 2 il müddətində davam etdiriləcək.
Tədbirdə çıxış edən “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov bildirib ki, Bakı limanı Avropa İttifaqının aparıcı limanları, nəqliyyat və logistika şirkətləri ilə yaxından əməkdaşlıq edir və bu əməkdaşlıq faydalıdır:
“Hazırda Bakı Limanl Belçika, Almaniya, Niderland, Rumıniya, Bolqarıstan, İtaliya, Sloveniya kimi dövlətlərin limanları ilə əməkdaşlıq edir. Aİ-nin dəstəyi ilə reallaşdırılan bu layihə ilə dünyanın qabaqcıl təcrübəsini regionumuza gətirmək və mövcud əməliyyat sistemini təkmilləşdirməklə yeniliklər tətbiq etmək niyyətindəyik”.
Nəqliyyat, rabitə və yüksək texnologiyalar nazirinin müavini Elmir Vəlizadə layihənin əhəmiyyətindən danışıb.
Dövlət Gömrük Komitəsi sədrinin müavini Şahin Bağırov deyib ki, Aİ ilə Azərbaycan gömrük orqanları bir sıra layihələr həyata keçirir. Onun sözlərinə görə, bu layihələrdən biri tranzitləşdirilmiş yüklərin elektron sistemə keçirilməsi ilə bağlıdır: “Bu bizə Avropa bazarlarına daxil olmağa imkan verəcək”.
Avropa İttifaqının Azərbaycandakı nümayəndəliyinin rəhbəri səfir Kestutis Yankauskas bildirib ki, Bakı Limanı Aİ-nin Asiya ilə ticarət zəncirinfə mühüm yer tutur: “Sevindirici haldır ki, bu ildən Avropa yük daşıyıcıları Bakı Limanının müasir informasiya-kommunikasiya sistemləri vasitəsilə onlayn rejimdə yüklərin yerini, üzərlərində aparılan əməliyyat və liman ərazisini tərk etmə, qonşu limanlara çatma vaxtını müşahidə edə biləcəklər. Biz Bakı limanının ən müasir təcrübə və biliklərin yiyələnməsində maraqlıyıq və bu dəstəyimizi davam etdirəcəyik”.
Daha sonra Aİ tərəfindən layihə rəhbəri, liman inkişafı üzrə ekspert Edvin Lok və ekspert Daniel Linot layihənin komponentləri və əsas nəticələrinə yönəlmiş təqdimatla çıxış ediblər.
P.Sultanova
