Türkiyəli müğənninin Gəncədə möhtəşəm konserti olub – FOTO
Türkiyəli müğənni Ferhat Göçer Gəncədə möhtəşəm konsert proqramı ilə çıxış edib.
1news.az-ın AZƏRTAC-a istinadla verdiyi xəbərə görə, ümummilli lider Heydər Əliyevin anadan olmasının 95-ci ildönümünə həsr olunan konsert Gəncə Şəhər İcra Hakimiyyətinin təşkilatçılığı ilə keçirilib.
Heydər Əliyev park-kompleksindəki Zəfər tağının önündə təşkil olunan konserti şəhər icra hakimiyyətinin başçısı Elmar Vəliyev, idarə, müəssisə rəhbərləri və minlərlə şəhər sakini izləyib.
Tədbir iştirakçıları əvvəlcə ümummilli lider Heydər Əliyevin abidəsini ziyarət edib, dahi rəhbərin əziz xatirəsinə öz ehtiramlarını bildiriblər.
Elmar Vəliyev deyib ki, ulu öndər Heydər Əliyevin anadan olmasının 95-ci ildönümü ölkəmizin hər yerində olduğu kimi, Gəncədə də silsilə tədbirlərlə qeyd edilir. “Heydər Əliyev olmasa idi, bugünkü Azərbaycan da olmazdı. Bu gün onun qurduğu Azərbaycan Respublikası dövrün tələbinə uyğun olaraq inkişaf edir, Heydər Əliyev siyasi kursunun layiqli davamçısı İlham Əliyevin apardığı düşünülmüş siyasət nəticəsində gələcəyə doğru inamla addımlayır. Bu inkişaf Gəncədə də qabarıq şəkildə görünür. Şəhərdə bir çox irimiqyaslı tikinti layihələri reallaşdırılır, geniş abadlıq-quruculuq işləri həyata keçirilir. Gəncə öz tarixi və memarlığını qorumaqla müasirləşir, gözəlləşir və bu inkişaf gələcəkdə də davam edəcək”, – deyə Elmar Vəliyev vurğulayıb.
Sonra Türkiyənin sevilən müğənnisi Fərhat Göçer Gəncə tamaşaçıları qarşısına çıxıb. Öz şəxsi ansamblının müşayiəti ilə hit mahnılarını səsləndirən türkiyəli sənətçi tamaşaçılara xoş anlar yaşadıb.
Ulu öndər Heydər Əliyevin Azərbaycan və Türkiyə haqqında söylədiyi müdrik bir ifadə - “bir millət, iki dövlət” fikrini xatırladan Ferhat Göçer Gəncədə özünü çox rahat və doğma məkandakı kimi hiss etdiyini deyib.
Müğənni konsert zamanı Azərbaycanın bəstəkar və xalq mahnılarına da müraciət edib. Onun ifa etdiyi “Gəncədən gəlirəm”, “Olmaz-olmaz”, “Gəl ey səhər” və “Xalq Heydər söyləyəcək” mahnıları tamaşaçılar tərəfindən alqışlarla qarşılanıb.
Konsertdə Gəncə Dövlət Filarmoniyasının və Göygöl Dövlət Mahnı və Rəqs Ansamblının kollektivi də çıxış edib.
Ümummilli lider Heydər Əliyevin anadan olmasının 95-ci ildönümünə həsr olunan konsert proqramı möhtəşəm atəşfəşanlıqla başa çatıb.
S.Xankişiyeva
