Azər Badamov AP-nin ikili standartları barədə: Azərbaycanın inkişaf etmiş ölkələrlə bir cərgədə olmasını həzm edə bilmirlər
Təəssüf ki, Avropa Parlamenti (AP) ölkələrə qarşı yanaşmada ikili standartlarla çıxış edir.
Bunu 1news.az-a açıqlamasında millət vəkili Azər Badamov Ermənistanda 40 gündən çoxdur aclıq aksiyası keçirən jurnalist Mqer Yeqizaryanın həbsdə vəfat etməsinə münasibət bildirərkən deyib. O xatırladıb ki, bunu AP-nin bloqqer Mehman Hüseynov məsələsinə yanaşmasında, “təcili” olaraq qəbul etdikləri qətnamə ilə bir daha gördük:
“Ermənistanda 40 gündən çoxdur aclıq aksiyası keçirən jurnalist, partiya lideri Mqer Yeqizaryan həbsdə vəfat edib. Amma buna qarşı həm AP, həm digər beynəlxalq təşkilatlar, müstəqil insan haqları qurumları susurlar.
Həmin təşkilatların ikili yanaşması özünün Fransada cərəyan edən hadisələrdə də göstərdi. Avropa qurumları, AP Fransada aksiyaçılara qarşı törədilən zorakılıqlara susdu, heç bir bəyanat vermədi.
Bütün bunlar onu göstərir ki, bizim dünyada mövcud olan yerimizi və nüfuzumuzu, Avropanın inkişaf etmiş ölkələri ilə bir cərgədə dayanmağımızı həzm edə bilməyən qruplar var. Həmin qruplar istənilən fürsətdən yararlanaraq qərəzli mövqelərini ortaya qoyurlar.
Əgər Avropa Parlamenti reallıqdan çıxış etsə, hər bir ölkəyə qarşı ədalətli mövqedə dayansa, onda bu qurumun nüfuzu da arta bilər”.
1news.az