Əfv sərəncamı İlham Əliyevin humanizm prinsiplərini daim rəhbər tutmasının bariz nümunəsidir

Azərbaycan Respublikasının Prezidenti cənab İlham Əliyev 2019-cu il martın 16-də, Novruz Bayramı ərəfəsində növbəti əfv sərəncamı imzalamışdır.

Azərbaycan xalqının ümummilli lideri Heydər Əliyevin ənənələrini davam etdirən bu Sərəncam Azərbaycan Respublikasının Prezidenti cənab İlham Əliyevin fəaliyyətində humanizm prinsiplərini daim rəhbər tutmasının bariz nümunəsidir.

Prezidentin sayca 33-cü olan bu Sərəncam əsasında 431 məhkum əfv olunmuş, onlardan 399-u azadlıqdan məhrum etmə cəzasından azad edilmişdir.

Azərbaycan Respublikasının Prezidenti cənab İlham Əliyevin fəaliyyəti dövründə, 2003-cü ildən başlayaraq əfv haqqında 33 fərman və sərəncam imzalanmış, onlar əsasında 5 minə yaxın məhkum şəxs əfv olunmuş, o cümlədən 4.500-dən çox şəxs azadlığa buraxılmışdır. Təkcə 2018-ci il 24 may tarixli sərəncamla 634 şəxs əfv olunmuşdur.

Ümummilli lider Heydər Əliyevin əfv və amnistiya təsisatlarını bərpa etdiyi 1995-ci ildən sonra isə 65 fərman və sərəncamla bütövlükdə 8 minə yaxın şəxs əfv olunmuşdur.

1995-ci ildən başlayaraq 117.000-ə yaxın şəxsi əhatə etmiş 11 amnistiya aktı qəbul edilmişdir. Bu şəxslərdən təxminən 30.000-i azadlığa buraxılmışdır.

Sonuncu 4 amnistiya aktı (2007, 2009, 2013, 2016) Heydər Əliyev Fondunun Prezidenti xanım Mehriban Əliyevanın irəli sürdüyü təşəbbüslər nəticəsində qəbul edilmişdir. 2016-cı ilin amnistiya aktı 10.000-dən çox məhkumu əhatə etmiş, 3.000-ə yaxın şəxs penitensiar müəssisələrdən buraxılmışdır.

Qeyd edilən faktlar ümummilli lider Heydər Əliyev, Azərbaycan Respublikasının Prezidenti cənab İlham Əliyev və Azərbaycan Respublikasının Birinci vitse-prezidenti xanım Mehriban Əliyevanın mərhəmət və insanpərvərliyinin əyani nümunələridir.

1news.az