Prezident: “Azərbaycan Ordusu düşmənin xüsusi təyinatlılardan ibarət böyük bir qrupunu zərərsizləşdirib”
“Onlar Hadrutu yenə işğal altına salmaq üçün bir neçə dəfə cəhd göstəriblər. Mənə bu səhər verilən məlumata görə, bu gecə Ermənistandan gəlmiş xüsusi təyinatlılardan ibarət böyük bir qrup Hadrutu yenidən işğal etməyə çalışıb”.
1news.az-ın APA-ya istinadən verdiyi xəbərə görə, bunu Azərbaycan Prezidenti İlham Əliyev “Haber Global” telekanalına müsahibəsində bildirib.
“Halbuki strateji nöqteyi-nəzərdən bunun Ermənistan üçün o qədər də böyük önəmi yoxdur. Sadəcə, olaraq gedib orada selfi çəkdirmək, yaxud öz əhalisinə hesabat vermək üçün belə addım atırlar. Azərbaycan Ordusu o böyük qrupu zərərsizləşdirdi. Orada bu gecə Ermənistanın verdiyi qurbanlar Paşinyanın məsuliyyətsiz və yırtıcı siyasətinin qurbanlarıdır”, - deyə Prezident vurğulayıb.
1news.az
