Sahibə Qafarova Pakistan səfərindən danışdı: “Jurnalistlərin minaya düşüb həlak olmasını diqqətə çatdırdım”
“Mənim rəhbərliyimlə mayın 31-dən iyunun 4-dək parlament nümayəndə heyəti Pakistanda İqtisadi Əməkdaşlıq Təşkilatı Parlament Assambleyasının İkinci Ümumi Konfransında iştirak etmək üçün rəsmi səfərdə olub”.
1news.az məlumatına görə, bunu Milli Məclisin bu gün keçirilən iclasında parlamentin sədri Sahibə Qafarova deyib:
“Mən İqtisadi Əməkdaşlıq Təşkilatının konfransında çıxışımda qeyd etdim ki, Azərbaycan İƏT-lə əməkdaşlığa böyük önəm verir. Konfransda dünya birliyini təhdid edən qlobal problemlərin müəyyən edilməsində parlament diplomatiyasının rolundan danışdım. Azərbaycan 30 ilə yaxın işğal faktoru ilə qarşılaşsa da, dünyada iqtisadi tərəfdaşlardan birinə çevrilib. Azərbaycanın işğala son qoyulduqdan sonra bərpa-quruculuq işlərində dost ölkələrin şirkətlərinin iştirakı qeyd edildi. Konfransın gedişində Pakistan Prezidenti və Baş naziri hər biri ayrı-ayrılıqda bütün nümayəndə heyətləri ilə görüşlər keçirdi. Bu görüşlər zamanı hərbçilərin və mülki şəxslərin ermənilərin basdırdığı minalara düşməsi kimi faktlar görüşlərdə qarşı tərəflərin diqqətinə çatdırıldı”
Sədr qeyd edib ki, Azərbaycan-Pakistan münasibətlərində son 30 ildə Pakistanın Ermənistanı dövlət kimi tanımaması xüsusi yer tutub:
“Pakistan 44 günlük Vətən müharibəsi dövründə də Azərbaycanın haqq işinə öz dəstəyini göstərib. Həm Pakistan dövlətinin başçısı, həm də parlamentin hər iki palatasının rəhbərləri Azərbaycanın bundan sonra da suverenliyini və ərazi bütövlüyünü dəstəkləyəcəyini bildirdi”.
İyunun 4-də Kəlbəcərin Susuzluq kəndində minaya düşərək şəhid olan mülki şəxs və media nümayəndələrinin ölümündən danışan Sahibə Qafara deyib:
“Kəlbəcərdə öz peşə fəaliyyətini yerinə yetirərkən 2 jurnalist və bir icra nümayəndəsinin müavini minaya düşərək həlak olub. Mən Pakistanda səfərin son günündə bu barədə məlumatları diqqətə çatdırdım. “Bu hadisə bizi çox kədərləndirdi. Bununla bağlı Milli Məclis həlak olanların ailələrinə başsağlığı verib”.
Qafar Ağayev
