ICESCO-nun Baş direktoru: AZƏRTAC-la media tərəfdaşlığımız Azərbaycan ilə əlaqələrimizin inkişafına yeni təkan olacaq
AZƏRTAC-la media tərəfdaşlığımız İslam Dünyası Təhsil, Elm və Mədəniyyət Təşkilatı (ICESCO) ilə Azərbaycan Respublikası arasında əlaqələrin daha da inkişafı üçün yeni təkan olacaq.
Bu sözlər ICESCO-nun Baş direktoru Salim bin Məhəmməd əl-Malikin rəhbərlik etdiyi təşkilatla AZƏRTAC arasında Əməkdaşlıq Memorandumunun imzalanması ilə əlaqədar agentliyə ünvanladığı məktubda yer alıb.
Məktubda deyilir: “ICESCO Azərbaycanla bütün səviyyələrdə yüksək əlaqələrindən şərəf duyur. Cənab Prezident İlham Əliyevin bu ilin yanvarında Azərbaycana səfər etmiş ICESCO-nun nümayəndə heyətini qəbul etməsi, eləcə də Birinci vitse-prezident Mehriban xanım Əliyevanın təşkilatımızın xoşməramlı səfiri olması əlaqələrimizin nə qədər dərin olduğunu bir daha sübut edir”.
Qeyd olunur ki, ICESCO ixtisaslaşdığı sahələrdə müvafiq nazirliklərdən və Azərbaycan Milli Komissiyasından tutmuş universitetlərə, tədqiqat mərkəzlərinə və AZƏRTAC-a qədər - Azərbaycanın bütün təsisatları ilə səmərəli və konstruktiv əməkdaşlıqda maraqlıdır.
“AZƏRTAC-la imzaladığımız memorandumun media sahəsində əməkdaşlıq, o cümlədən Azərbaycandan və ICESCO-ya üzv dövlətlərdən olan jurnalistlərin və media işçilərinin təlimi, eləcə də peşə bacarıqlarının formalaşdırılması üçün geniş perspektivlər yaratmasını arzulayırıq”, - deyə məktubda vurğulanır.
Salim bin Məhəmməd əl-Malik ICESCO-nun keçirdiyi tədbirləri və forumları geniş işıqlandırdığına, eləcə də informasiya təminatında göstərdiyi dəqiqlik və yüksək peşəkarlığa görə AZƏRTAC-ın kollektivinə təşəkkürünü ifadə edib, birgə əməkdaşlıq proqramlarının icrasına başlamağa hazır olduqlarını bildirib.
Qeyd edək ki, iyunun 18-də ICESCO və AZƏRTAC media sahəsində Əməkdaşlıq Memorandumu imzalayıblar. Sənəd birgə layihələrin və proqramların hazırlanıb reallaşdırılmasında, ICESCO-ya üzv ölkələrin KİV nümayəndələri üçün təcrübə mübadiləsinin və təlim kurslarının, media üzrə beynəlxalq konfransların, forumların və ixtisaslaşdırılmış seminarların təşkilində, informasiyaların, foto və video xəbərlərin hazırlanması və yayımında əməkdaşlığı nəzərdə tutur.
