Kiçik dostlarımıza ümid olaq: Sahibsiz heyvanlar üçün pilot layihəyə start verilib – FOTO – VİDEO

Bildiyiniz kimi, artıq Bakı şəhərində sahibsiz heyvanların yemlənməsi üçün “Sahibsiz heyvanların bəslənmə köşkü” adlı pilot layihəsinə start verilib.

Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin rəsmisi Arzu Səmədova 1news.az-a bildirib ki, pilot layihə çərçivəsində 2 ədəd bəslənmə köşkü Türkiyədən sifariş verilərək Azərbaycana gətirilib:

“Pilot layihə Türkiyə təcrübəsinə söykənir. Bu layihə Türkiyədə uğurla davam edir. Ölkəmizdə də pilot layihə olduğu üçün hələki, bu köşklərin sayı 2 ədəddir. Köşklər hələlik Ekologiya və Təbii Sərvətlər Nazirliyinin inzibati binasının qarşısında quraşdırlıb. Səyyar xarakter daşıdığı üçün bir yerdən başqa yerə daşına bilir. Layihənin gedişatından sonra şəhərin digər yerlərinə daşınması planlaşdırılır”.

Xidmət rəsmisi bildirib ki, bu köşklərdən əlavə, sahibsiz heyvanların soyuq hava şəraitində sığınmaları üçün sığınacaq evciklər hazırlanıb, onlar da şəhərin müxtəlif yerlərinə quraşdırılacaq.

“Köşklərə gəldikdə, onlar günəş panelləri ilə təchiz olunub, enerjiyə qənaət mexanizmi əsasında çalışacaq. İki ədəd köşkün hər birinin 40 qram yem vermə xüsusiyyətinə malik olsa da, onların hər birinin iş prinsipi bir-birindən fərqlənir. Belə ki, köşklərindən biri 0,40 qəpik ödəniş etməklə 40 qram yem verir. Digəri isə, plastik tullantı atmaqla eyni ölçüdə yem vermək xüsusiyyətinə malikdir”, - A.Səmədova qeyd edib.

Xidmət rəsmisi sözlərinə əlavə edib ki, pilot layihənin həyata keçirilməsində məqsəd qayğıya ehtiyacı olan sahibsiz heyvanlara mərhəmət və sevgi göstərilməsi ənənəsini formalaşdırmaqdır:

“Həmçinin layihənin digər məqsədi plastik tullantıların təkrar emalına dəstək göstərməkdir. Bu cür bəslənmə köşkləri həm itlər, həm də pişiklərin qidalanması üçün nəzərdə tutulub”.