Zakir Quliyev: Taxtakörpü su anbarı istifadəyə verildikdən sonra demək olar ki, əhalimizin içməli suda olan problemi hiss olunmadı - FOTO

“Taxtakörpü su anbarı ölkəmiz üçün strateji əhəmiyyət kəsb edir” .

1news.az xəbər verir ki, bunu "Meliorasiya və Su Təsərrüfatı" ASC-nin sədr müavini Zakir Quliyev Şabran rayonunda Su təsərrüfatı meliorasiya işçiləri günü münasibətilə keçirilən mediaturda jurnalistlərə açıqlamasında bildirib.

O deyib ki, bu obyekt ölkəmizin şimal zonasını su təminatı ilə yanaşı, Sumqayıt, Bakı şəhərləri və Abşeron rayonunun içməli suya olan tələbatının ödənilməsində önəmli rol oynayır. “Taxtakörpü su anbarının təməlqoyma mərasimi cənab Prezident İlham Əliyev tərəfindən 2007-ci ildə həyata keçirilib. 2013-cü ildə Taxtakörpü Su anbarı istifadəyə verilib. Bu anbar ona görə strateji obyektdir ki, Taxtakörpü su anbarının əsas su mənbəyi Samur çayıdır. Son 4-5 ildə qlobal iqlim dəyişikliyi fonunda Samur çayında su axını ilbəil azalır.

Ona görə də biz bu obyektlə ölkəmizin içməli suya olan tələbatını, etibarlı su təminatının həyata keçirilməsi təmin etmiş olmuşuq. Bu, möhtərəm cənab Prezidentimizin iradəsi ilə həyata keçirilib. Anbar istifadəyə verildikdən sonra demək olar ki, əhalimizin içməli suda olan problemi hiss olunmadı. Əgər Taxtakörpü su anbarı istifadəyə verilməsəydi, mən bu gün açıq deyə bilərəm ki, bu gün insanlar evlərinə qablarla su apara bilərdi. Qabaqlayıcı tədbir olaraq cənab Prezidentin tapşırığı ilə bu anbarın tikilib istifadəyə verilməsi su qıtlığı probleminin qarşısını aldı və vaxtından qabaq tədbirlər həyata keçirildi”.

O bildirib ki, Taxtakörpü su anbarı Azərbaycanın Şimal zonasınının çaylarından da qidalanır.

“Belə ki, Qudyalçay, Vəlvəlçay, Qusarçay, Caqacuqçay və s. digər çaylardan qidalanır. Taxtakörpü su anbarının ümumi su tutumu 268 milyon kubmetrdir, bəndinin hündürlüyü 135 metrdən yuxarıdır, bəndin uzunluğu isə 1180 metrdi. İndiyədək anbara toplanan suyun həcmi 3 milyard 254 milyon kubmetr olub. Bu suyun 3 milyard 50 milyonu Ceyranbatan su anbarına nəql olunub. Anbarın unikallığı ondan ibarətdir ki, bura həm daxil olan, həm də nəql olunan su öz axımı həyata keçirilir". “Anbarın istifadəyə verilməsi ilə yanaşı, eyni zamanda şimal regionunda 50 min hektardan yuxarı torpaq sahəsi buradan suvarılır. Onlardan 30 min hektarı yeni əkin sahələrdir” - deyə, Z. Quliyev əlavə edib.

FOTO: Nadir İbrahimli