Ermənistan-Türkiyə yaxınlaşması Ermənistan-Azərbaycan münasibətlərinə necə təsir edəcək? - ŞƏRH
Dünən Ermənistan Xarici işlər naziri Ararat Mirzoyanın başçılıq etdiyi nümayəndə heyəti Türkiyənin paytaxtı Ankarada rəsmi səfərdə olub, türkiyəli həmkarı Mövlüd Çavuşoğlu görüşərək, erməni xilasedicilərinin axtarış-xilasetmə işləri apardığı Türkiyənin Adıyaman şəhərinə gedib.
Türkiyənin xarici işlər naziri Mövlud Çavuşoğlu erməni həmkarı Ararat Mirzoyanla mətbuat konfransı zamanı Ermənistanla Türkiyə arasında tarixi İpək yolu körpüsünün bərpası haqda da düşündüklərini deyib. Mirzoyan isə Ermənistan hökuməti adından Türkiyə xalqına və hökumətinə başsağlığı verib.
Məsələ ilə bağlı 1news.az-a Milli Məclisin deputatı Arzu Nağıyev açıqlama verib. Deputatın sözlərinə görə, Ermənistan münasibətləri tam şəkildə tənzimləməyə çalışır:
“Məlumata görə, öncə təkbətək görüş, sonra isə nümayəndə heyətinin iştirakı ilə görüş keçirildi. Sonra Ermənistan nümayəndə heyəti zəlzələ baş verən əraziyə getdi. Qeyd etmək istərdim ki, bu Mirzoyanın Türkiyəyə ikinci səfəridir. Birinci səfəri 2022-ci ilin mart ayında olub. Həmin görüşdə diplomatik formada iştirak edib, həmçinin Çavuşoğlu ilə də görüşmüşdü. Mirzoyan görüş zamanı açıqladı ki, Ermənistan münasibətləri tam şəkildə tənzimləməyə çalışır, regionda sülhün bərqərar olmasında, Türkiyə ilə münasibətlərin tam normal olmasında, diplomatik münasibətlərin qurulmasında maraqlıdır. Ankarada keçirilən görüşdə Çavuşoğlu da qeyd etdi ki, bu proseslərlə bağlı bəzi detallara da aydınlıq gətirilib. Eyni zamanda, zəlzələ nəticəsində Ermənistan tərəfinin də yardımları yüksək qiymətləndirilib. Türkiyənin Xarici işlər naziri erməni xilasedicilərin əməyini yüksək qiymətləndirib və bir neçə insanın həyatını xilas etdikləri üçün onlara təşəkkürünü bildirib. Bildirək ki, erməni xilasedicilər fevralın 8-dən hadisə baş vermiş ərazidədirlər. Xilasedicilər əraziyə Ermənistan-Türkiyə quru sərhəddi ilə gətiriliblər.
Onu da qeyd etmək lazımdır ki, təbii fəlakət zonasına Ermənistan tərəfindən 28 xilasedici, 100 ton isə yardım gətirilib. Məqsəd ondan ibarətdir ki, iki ölkə arasında münasibətlər normallaşsın, başlanmış danışıqlar isə davam etdirilsin. Mirzoyan həmçinin “Ani” körpüsünün təmiri ilə də bağlı danışıb. Əlavə olaraq zəlzələdə həlak olanların ailələrinə baş sağlığı da verib”.
A.Nağıyevin sözlərinə görə, Ermənistan-Türkiyə yaxınlaşması Ermənistan-Azərbaycan münasibətlərinə də müsbət təsir edə bilər:
“Onu da vurğulayım ki, Ermənistan-Türkiyə yaxınlaşmasından Azərbaycana hər hansısa bir ciddi problem yaranmır. Çünki bu ermənilərə daha çox lazımdır. Ermənilərin iqtisadi və başqa problemlərini həll etmək üçün ata biləcəkləri ən ciddi addımlardan biri ola bilər. Ermənistan-Türkiyə münasibətlərinin pozulması, sərhədin bağlanması Qarabağ münaqişəsinə görə idi. Hazırda demək olar ki, Qarabağ münaqişəsi öz həllini tapıb. Həmçinin Ermənistan-Azərbaycan arasındakı münaqişə sona çatmaq üzrədir. Mən belə düşünürəm ki, Ermənistan-Türkiyə münasibətlərinin düzəlməsi ancaq müsbət təsirləri ola bilər”.
Onu da qeyd edək ki, 35 ildən sonra ilk dəfə Ermənistan-Türkiyə arasındakı quru sərhəddi açılıb. Mirzoyan bunun simvolik addım olduğunu bildirib.
