Deputat: “Azərbaycan Cənubi Qafqazda qarşısına qoyduğu bütün hədəflərə çatacaq”
"Hazırda beynəlxalq təşkilatların çoxu Ermənistanı yazıq, aciz kimi qələmə verirlər. Halbuki uzun illər Azərbaycan torpaqları ermənilər tərəfindən işğal olunmuşdu".
Bu sözləri 1news.az-a açıqlamasında Milli Məclisin Deputatı Naqif Həmzəyev deyib.
Deputatın sözlərinə görə, Münxen Təhlükəsizlik Konfransında Azərbaycan Prezidenti İlham Əliyevlə, Azərbaycan nümayəndə heyətinin təmsil olunması Azərbaycanın yerinin beynəlxalq arenada nə qədər yüksək səviyyədə olmasını sübut etdi.
"Bütün bunlarla yanaşı Azərbaycan bütün platformalarda sülh və əminamanlığa daha çox töhfə verən dövlətlərdən biri kimi tanınır. Mən düşünürəm ki, İlham Əliyevin səsləndirdiyi fikirlər və problemlərin həlli ilə bağlı sərgilədiyi mövqe, beynəlxalq ekspertlər və təşkilatlar tərəfindən müsbət dəyərləndirilir. Azərbaycan böyük platformalarda uzun illər idi ki, erməni təcavüzünə son qoyulmasını tələb edirdi".
N.Həmzəyev deyib ki, beynəlxalq ictimaiyyət Ermənistanın Azərbayacana qarşı etdiyi təcavüzə göz yumurdu:
"Azərbaycan öz gücü hesabına torpaqlarını azad etdi. Hazırda beynəlxalq təşkilatların çoxu Ermənistanı yazıq, aciz kimi qələmə verirlər. Halbuki uzun illər Azərbaycan torpaqları ermənilər tərəfindən işğal olunmuşdu. Ermənilər onlara yaradılan şəraitdən istifadə etməli və Cənubi Qafqazda sülh və əminamanlığın yaranması üçün çalışmalıdırlar. Xüsusilə bu konfransda İlham Əliyevin keçirdiyi görüşlər onu deməyə imkan verir ki, Azərbaycan Avropanın enerji təhlükəsizliyində yaxından iştirak edən dövlətdir. Azərbaycanın əməkdaşlığa açıq olduğu da məlumdur. Azərbaycan əməkdaşlıqda sadiqlik nümayiş etdirə bilir. Bunu Azərbaycan sözdə yox əməldə sübut edir. Yaxın gələcəkdə Azərbaycan Cənubi Qafqazda qarşısına qoyduğu bütün hədəflərə çatacaqdır".
