İranda su böhranı yaşanır

İranın paytaxtı Tehran şəhərinin mərkəzində, həmçinin qərb və şimal bölgələrində içməli su qıtlığı yaranıb.

1news.az APA-ya istinadla xəbər verir ki, yerli mediada yayılan xəbərlərə görə, Tehranın bir çox ərazilərində artıq altın gündür su kəsilib və hökumət problemi həll etmək üçün verdiyi vədləri yerinə yetirmir.

Sosial şəbəkədə Tehranın mərkəzi hissələrinə su verildiyinə dair görüntülər yayılıb. Bəzi mənbələr bildirir ki, əhaliyə paylanan su içməli deyil və sağlamlığa zərərlidir. Hökumət su qıtlığını son günlər baş verən sel və daşqınlarla əlaqələndirib, əhaliyə məsuliyyətli olmağı və problemin həll yolu üçün sudan daha qənaətlə istifadə etməyi tövsiyə edib.

Ekspertlər su qıtlığının bir çox problemə səbəb olduğunu, hətta mineral suyun da çatışmadığını bildirib. Ölkənin bəzi bölgələrində içməli su qıtlığının yaranması İrandan içməli suyun ixrac olunduğuna dair iddiaları artırıb. Mineral Su İxracatçıları Cəmiyyətinin katibi Peyman Furuhər deyib ki, ötən il Rusiyaya 6-7 milyon dollar olmaqla, təxminən, 10 milyon dollar dəyərində su ixracatı olunub.

Latın Amerikasında səfərdə olan Prezident İbrahim Rəisi energetika naziri ilə telefon danışığı aparıb və su qıtlığı probleminin həlli ilə bağlı tapşırıqlar verib.

Qeyd edək ki, son illərdə ölkənin bir çox şəhərlərində hakimiyyətin su ehtiyatlarını düzgün idarə etməməsinə, zərərli bənd tikintisinə və kənd təsərrüfatını, içməli su mənbələrini məhv edən çayların siyasi motivli şəkildə dəyişdirilməsinə qarşı kütləvi etirazlar keçirilir. İran, ən azı, on ildir quraqlıqdan əziyyət çəkir və rəsmilər yağıntıların daha da azalacağı ilə bağlı xəbərdarlıq edir.