Azərbaycanın bədxahlarının dəyirmanına kim su tökür?
Prezident İlham Əliyevin rəhbərliyi ilə Azərbaycan dövlətinin həyata keçirdiyi uğurlu, balanslaşdırılmış xarici siyasət təkcə regionda deyil, dünya səviyyəsində də rəğbətlə qarşılanır.
Türk dünyasının liderlərindən olan ölkəmizin türk ölkələri arasında siyasi, iqtisadi və mədəni əlaqələrin möhkəmlənməsində əvəzsiz xidmətləri var. İslam Əməkdaşlıq Təşkilatının fəal üzvü olan Azərbaycan İslam həmrəyliyinin möhkəmlənməsinə mühüm töhfə verib və şübhəsiz ki, Şuşa şəhərinin İslam dünyasının mədəniyyət paytaxtı seçilməsində də bu amil böyük rol oynayıb. 2024-cü ildə Qətərdə İslam dünyası ölkələrinin mədəniyyət nazirlərinin 12-ci konfransında bununla bağlı qərar qəbul edilib. Türk dünyası ölkələri ilə əlaqələrin inkişafının yekunu Türk dünyası ölkələrinin Zirvə toplantısının Şuşa şəhərində keçirilməsidir.
Avropa ölkələri ilə əməkdaşlıq heç də bundan az uğurla inkişaf etmir. Azərbaycan “köhnə qitənin” on ölkəsi ilə strateji tərəfdaşlıq Sazişi imzalayıb. Ölkəmizin Avropanın energetika təhlükəsizliyinin təmin edilməsində danılmaz xidmətləri var. Avropa İttifaqının xarici işlər və təhlükəsizlik siyasəti üzrə Ali nümayəndəsi Cozef Borelin Azərbaycanla Aİ arasında münasibətlərin inkişafına mane olmaq cəhdlərinə baxmayaraq, bu əlaqələr ildən-ilə möhkəmlənir, çünki Avropada hər kəs bu qitənin enerji resurslarının təchizatçısı kimi Azərbaycanın əvəzsiz rolunu qəbul edir.
2023-cü ilin yanvarında Azərbaycan səfirliyinə qarşı törədilən terror aktından sonra kəskin şəkildə pisləşən qonşu İran İslam Respublikası ilə münasibətlər sabitləşib. İki ölkənin prezidentlərinin iştirakı ilə bu ilin may ayında “Xudafərin” hidroqovşağının istismara verilməsi və “Qız Qalası” hidroqovşağının açılışı mərasimi olub.
Azərbaycanın BMT-dən sonra ən böyük beynəlxalq təşkilatlardan biri olan Qoşulmama Hərəkatına sədrliyi çoxsaylı uğurlu layihələrlə yadda qalıb. Bura koronavirus pandemiyası zamanı az inkişaf etmiş ölkələrə humanitar yardım, alyansa daxil olan ölkələrlə iqtisadi əlaqələrin genişləndirilməsi daxildir.
Azərbaycanın Afrika və Asiya ölkələri ilə əlaqələri də fəal inkişaf edir. Ən yüksək səviyyədə və parlamentlərin, müxtəlif dövlət qurumlarının nümayəndə heyətləri səviyyəsində səfərlər həyata keçirilir, iqtisadiyyatın bir çox sahələrində, humanitar və sosial sahələrdə qarşılıqlı faydalı əməkdaşlıq qurulur.
Regionda balanslaşdırılmış siyasət yürüdən ABŞ-la əlaqələr də hər iki ölkənin maraqlarına cavab verir. Siyasətçilər arasında tez-tez təmaslar, Ağ evin rəhbəri Co Baydenin Prezident İlham Əliyevə bu yaxınlarda göndərdiyi iki təbrik - bütün bunlar Azərbaycan-ABŞ əlaqələrinin inkişafından xəbər verir. Prezident Co Baydenin Prezident İlham Əliyevə müraciətləri rəsmi Vaşinqtonun Azərbaycanın regiondakı əsas rolunu tanımasının və ölkəmizlə qarşılıqlı faydalı əməkdaşlığı daha da dərinləşdirmək niyyətində olmasının sübutdur.
Son illər Azərbaycanla münasibətlərdə yüksək dinamikanın müşahidə olunduğu ölkələrdən biri də Çin Xalq Respublikasıdır. Azərbaycan Avropa ilə Asiya arasında marşrutun mühüm tranzit məntəqəsi, Çin Xalq Respublikası Sədrinin təşəbbüsü ilə həyata keçirilən “Bir kəmər, bir yol” layihəsinin əsas iştirakçılarından biridir. “Vahid Çin” siyasətini dəstəkləyən ölkəmiz ÇXR ilə sosial-iqtisadi sahədə əlaqələri fəal şəkildə inkişaf etdirir.
Bu ilin noyabrında Bakıda İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası olan COP29 qlobal tədbirinin keçiriləcəyi məkan kimi Azərbaycan paytaxtının seçilməsi, şübhəsiz ki, ölkəmizə yüksək etimadın təzahürü, ölkəmizin ətraf mühitin mühafizəsi və yaşıl enerjinin inkişafı məsələlərində xidmətlərinə verilən qiymətdir.
Son illər MDB ölkələri ilə əlaqələr daha da möhkəmlənib. Bu, keçmiş postsovet respublikaları arasında artan ticarət dövriyyəsində, humanitar əməkdaşlığın genişlənməsində, ali və yüksək səviyyədə qarşılıqlı səfərlərdə özünü göstərir. Şimal qonşumuz Rusiya ilə iqtisadi, mədəni, sosial sahələrdə əlaqələr inkişaf edir. Prezident İlham Əliyevin həyata keçirdiyi siyasətdə MDB ölkələri ilə münasibətlərdə Rusiyanın regionları, o cümlədən ölkəmizin uzun tarixə malik möhkəm əlaqələri olan Şimali Qafqaz respublikaları ilə əməkdaşlığa da böyük diqqət yetirilir. Bu kontekstdə Azərbaycan xalqının Ümummilli Lideri Heydər Əliyevin Şimali Qafqaz respublikaları ilə əlaqələrə verdiyi böyük diqqəti, Rusiyanın bu regionlarına səfərlər etməsini, nümayəndə heyətlərini qəbul etməsini xüsusi qeyd etməliyik. İlham Əliyevin prezidentliyi dövründə Azərbaycan ilə Şimali Qafqaz xalqları arasında əlaqələr daha da möhkəmlənib.
Heç bir hərbi blokun üzvü olmayan və Qoşulmama Hərəkatının üzvü olan Azərbaycan Rusiya-Ukrayna qarşıdurması məsələsində öz mövqeyində Hərəkatın statusunu rəhbər tutur. Təəssüflər olsun ki, əsasən xarici dairələrlə əlaqəli bəzi yerli informasiya resursları mütəmadi olaraq Azərbaycanın xarici aləmlə, o cümlədən postsovet məkanı ölkələri ilə möhkəm münasibətlərinə xələl gətirməyə və bununla da dövlətimizin xarici siyasətinə zərər verməyə çalışır. Bu saytlar arasında Azərbaycanın xarici siyasət maraqlarına zidd olan materialların tez-tez ortaya çıxdığı “haqqin.az” saytının fəaliyyətini qeyd etməliyik. Bunu bu saytın informasiya siyasətində dövlət əleyhinə xəttin olması kimi də şərh etmək olar ki, bu da həmin materialların fərdi xarakter daşıdığını göstərir. Bu, çox güman ki, xarici dairələrin nəzarəti altında olan xarici müəlliflərin məqalələrində də aydın görünür. Bu saytlarda Gürcüstan müxalifətinə, Fransa rəhbərliyinin göstərişi ilə hərəkət edərək Gürcüstan-Azərbaycan münasibətlərinə xələl gətirməyə çalışan Salome Zurabişvilinin təbliğatına geniş yer verilir. Keşikçidağ kompleksi ətrafında vəziyyəti gərginləşdirən, xarici jurnalistlərin müşayiəti ilə oraya səfər edən də məhz xanım Zurabişvili olmuşdu. Anti-Azərbaycan hədəfini göstərən faktlardan biri də “azeriherald” saytının fəaliyyəti, onun “Azad söz” yutub kanalı ilə koordinasiyalı təbliğatıdır. Bu cür fəaliyyətlərin Azərbaycanın xarici siyasət uğurlarına xələl gətirmək, Prezident İlham Əliyevin siyasi kursunun uğurlarını gözdən salmaq məqsədi daşıdığı danılmazdır. Azərbaycan kifayət qədər həssas regionda yerləşir və təbii ki, informasiya resurslarımızın fəaliyyəti ölkəmizin xarici siyasət əlaqələrinin möhkəmlənməsinə yönəlməlidir. Bu sadə həqiqəti dərk etməyən və ya anlamaq istəməyənlər çətin ki, gözlənilən nəticəni əldə etsinlər və onlar hər bir yanlış addım ilə ictimaiyyətin gözündən daha çox düşəcəklər.
Fərid Həsənov
