Yeganə Hacıyeva: Azərbaycan yeni çağırışlara cavab verən parlament formalaşdırmaq mərhələsindədir

“Regionda və dünyada gedən proseslər ölkələr üçün öz daxili və xarici siyasətlərinə yenidən baxmaq, korrektələr etmək zərurəti yaradıb”.

1news.az xəbər verir ki, bunu “Seçki 2024” Müstəqil Media Mərkəzinə açıqlamasında politoloq Yeganə Hacıyeva deyib.

"Azərbaycan da aparıcı ölkələrdən biri kimi, bu prosesləri diqqətlə təqib edir. Bu gün Azərbaycan yeni çağırışlara cavab verən parlament formalaşdırmaq mərhələsindədir. Diqqət yetirsək, qonşu ölkələrdə, yaxın və uzaq regionlarda da bir seçki trendinin olduğunu görərik. Yeni şərtləri vaxtında dəyərləndirib özünün qanunverici orqanını zamanın tələblərinə uyğunlaşdıran ölkələrin siyasətləri daha uğurlu olacaq”, deyə Y.Hacıyeva bildirib.

Politoloq bildirib ki, Azərbaycanda keçiriləcək növbədənkənar parlament seçkiləri yerli və beynəlxalq ictimaiyyətin diqqət mərkəzindədir: “ATƏT-in Demoktatik Təsisatlar və İnsan Haqları Bürosundan, ATƏT-in Parlament Assambleyasından, həmçinin, Azərbaycanın digər beynəlxalq tərəfdaşlarından təşəbbüslər gəlməkdədir. Azərbaycan da bu təşəbbüsləri dəyərləndirir”.

Yeganə Hacıyeva qeyd edib ki, Azərbaycanın işğaldan azad olunmuş ərazilərində parlament seçkiləri üzrə səsvermənin ilk dəfə keçirilməsi çox önəmli məsələdir: “İndiyədək Milli Məclisdə işğal olunmuş ərazilərdən təmsilçilik olub. Amma seçildikləri ərazilərə gedə bilməyən, oranın problemləri ilə tam miqyasda məşğul ola bilməyən təmsilçilik var idi. Həmin ərazilərin seçiciləri məcburi köçkün idi. Bu seçkilər isə nominal iştirakçılıqdan funksional iştirakçılığa keçən mərhələdir”.