IOTA-nın icraçı katibi: “Dövlət Vergi Xidməti Uzun müddətdir ki, IOTA-nın sadiq üzvüdür”
2024-2025-ci illərdə Azərbaycan Respublikasının İqtisadiyyat Nazirliyi yanında Dövlət Vergi Xidməti (DVX) Avropadaxili Vergi Administrasiyaları Təşkilatına (IOTA) prezidentliyi həyata keçirir və uzun müddətdir ki, DVX IOTA-nın sadiq üzvüdür.
1news.az xəbər xəbər verir ki, IOTA-nın icraçı katibi Aliks Perinyon De Troy Bakıda keçirilən karbon qiymətləndirilməsi üzrə beynəlxalq konfransda bildirib.
"Bu gün müzakirə edəcəyimiz mövzu çox əhəmiyyətli və aktualdır, çünki iqlim çağırışlarının həlli ilə bağlıdır. IOTA üzv ölkələr arasında qabaqcıl təcrübələrin mübadiləsini daim diqqətdə saxlayır. Bu tədbir də vergi orqanları arasında iqlim dəyişikliyi ilə mübarizə sahəsində biliklərin və təcrübələrin paylaşılması baxımından əhəmiyyətli platformadır".
O, bildirib ki, tədbirin keçirilməsində əsas hədəflərdən biri karbon qiymətqoyma üzrə təşəbbüsləri nəzərdən keçirmək, bu sahədə ölkələrin fəaliyyətinin əlaqələndirilməsini və əməkdaşlığın təşviqini təmin etməkdir.
"Məlum olduğu kimi Paris Sazişinin 6-cı maddəsində karbon bazarları ilə əlaqədar bir sıra hədəflər müəyyənləşdirilib. Bu gün və sabahkı müzakirələrimiz karbon qiymətqoyma və karbon vergisi ilə bağlı təşəbbüsləri əhatə edəcək. Karbon qiymətqoymasının tətbiqi mexanizmlərini təkmilləşirmək sağlam və təhlükəsiz ekoloji mühit üçün əhəmiyyət daşıyır.
İnanıram ki, bu Forum vergi administrasiyaları arasında dialoqun inkişafına töhfə verməklə gələcək əməkdaşlıqlar üçün möhkəm bünövrə olaraq noyabrda Bakıda keçiriləcək COP29 tədbirinin prioritetlərinin reallaşdırılması üçün də faydalı olacaq".
Foto: Trend İnformasiya Agentliyi
