ru

FORMULA 1

27 Aprel saat 16:30

“Formula-1” mövsümü Avstriyada açmağa hədəflənib. Azərbaycan qran-prisi sentyabr və ya oktyabrda keçirilə bilər

“Formula-1” mövsümü Avstriyada açmağa hədəflənib. Azərbaycan qran-prisi sentyabr və ya oktyabrda keçirilə bilər

Fransa Qran-prisi 2020-ci ildə baş tutmayacaq.

1news.az -ın məlumatına görə, belə bir qərar yarış təşkilatçıları tərəfindən koronavirus pandemiyasının fəsadları səbəbindən qəbul edilib.

Fransa Qran-prisinin əvvəlcədən planlaşdırılan vaxtda baş tutmayacağı çoxdan bəlli idi. Yarışın iyunun 28-də keçirilməsi nəzərdə tutulmuşdu, ancaq hakimiyyətin kütləvi tədbirləri qadağan etməsi ilə əlaqədar olaraq Qran-prinin ən azı təxirə salınacağı bəlli idi. İndi isə təşkilatçılar yarışı tamamilə ləğv etmək qərarına gəldilər. Fransa Qran-prisi Avstraliya və Monakodan sonra ləğv edilən üçüncü yarış idi. Digər 7 mərhələ təxirə salınıb.

Beləliklə, ləğv edilməyən və ya yenidən planlaşdırılmamış cari təqvimdə ilk mərhələ 5 iyul tarixində keçiriləcək Avstriya Qran-prisidir. Bu gün “Formula-1”in icraçı direktoru Çeyz Keri açıqlama verərək 2020-ci ilə olan planlardan danışıb və mövsümü iyul ayında Avstriyada açmağı hədəflədiklərini bildirib.

“Səhər iyun ayının sonuna planlaşdırılan Fransa Qran-prisinin baş tutmayacağı elan edilsə də, indi bu yay mövsümü başlamaq planlarımızın həyata keçirilməsində əvvəlkindən daha çox inamlıyıq.

İyul, avqust və sentyabrın əvvəllərində Avropa mərhələlərini keçirməyi planlaşdırırıq. Sentyabr, oktyabr və noyabrda Avrasiya, Asiya və Amerikada yarışacağıq və mövsümü dekabrda Bəhreyndə və Abu Dabidə başa vuracağıq, ümumilikdə 15-18 mərhələ ocaq.

Ən qısa müddətdə son təqvimi dərc edəcəyik. İlk yarışın azarkeşsiz keçiriləcəyini gözləyirik, amma mövsüm davam etdikcə onların tədbirlərdə iştirak edə biləcəyinə ümid edirik.

Bir çox məsələlər həll olunmalı, komandalar və digər tərəfdaşlarımız bu ölkələrə gələ və orada işləyə biləcəkləri prosedurları təyin etməlidirlər. İştirakçıların sağlamlığı və təhlükəsizliyi prioritet olaraq qalır. Bu prosedurların risk və mümkün problemlərdən qaçacağımıza imkan verdiyinə tam əmin olandan sonra irəli doğru gedəcəyik.

FIA, komandalar, promouterlər və digər əsas tərəfdaşlar bütün bu müddət ərzində bizimlə işlədilər. İnanılmaz dərəcədə çətin bir dövrdə onlara göstərdikləri dəstək və səylərinə görə təşəkkür etmək istəyirik”- deyə, bəyanatda qeyd olunur.

Qeyd edək ki, 5-7 iyun tarixlərində keçirilməli olank Azərbaycan Qran-prisi qeyri-müəyyən müddətə təxirə salınıb. “Formula 1”in cari mövsüm üçün planlarına əsasən, Bakı yarışı sentyabr və ya oktyabr aylarında keçirilə bilər.

Lakin aprelin 24-də Baku City Circuit əməliyyat şirkəti Azərbaycanın yarışı tamaşaçısız keçirmək niyyətində olmadığını açıqladı. Bunu nəzərə alsaq 2020-ci ildə Bakıda Formula-1 yarışının olmayacağını düşünmək üçün bütün əsasların olduğunu deyə bilərik.

Teymur Maksutov

BÖLMƏDƏ YENİ

ƏN ÇOX OXUNANLAR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News", İnformasiya Agentliyi
Bütün hüquqlar qorunur