ABŞ-da Azərbaycanın tranzit ölkəsi kimi artan rolu müzakirə olundu
10 dekabrda Vaşinqtondakı Amerika-Azərbaycan Ticarət Palatasında (USACC) “Transxəzər ticarət və nəqliyyat dəhlizi: Bakı Beynəlxalq Dəniz Ticarət Limanının rolu” mövzusunda brifinq keçirilib.
1news.az –a USACC-nin mətbuat xidmətindən verilən məlumata görə, tədbiri palatanın direktoru Syuzan Sadıqova açıq elan edərək sözü mövzu üzrə məruzəçi Bakı Beynəlxalq Dəniz Ticarət Limanının baş direktoru Taleh Ziyadova verib.
T.Ziyadov tədbir iştirakçılarına Şərq-Qərb ticarət və nəqliyyat yollarının inkişaf tarixindən və son illərin geosiyasi və iqtisadi hadisələri fonunda Azərbaycanın tranzit ölkəsi kimi artan rolundan bəhs edib.
Daha sonra məruzəçi Ələt limanında həyata keçirilən işləri qeyd edərək, məsələnin qanunvericilik və loqistik aspektlərinə toxunub.
Qeyd edək ki, brifinqdə USACC-a daxil olan müxtəlif şirkətlərin nümayəndələri, həmçinin, digər təşkilatlar və Vaşinqtonda akkreditasiya keçmiş diplomatik korpus nümayəndələri iştirak edib.
