Nazirlik: Gül satan dəstə üzvlərinin şəxsiyyətinin müəyyənləşdirilməsi istiqamətində tədbirlər görülür - YENİLƏNMƏ

Xəbər verdiyimiz kimi, sosial şəbəkələrdə gül gətirmək adı ilə mənzillərin qapısını döyən şəxslərdən birinin yeni videogörüntüsü yayılıb.

Məsələ ilə bağlı Daxili İşlər Nazirliyinin mətbuat xidmətindən 1news.az-a verilən məlumata görə, hazırda gül gətirmək adı ilə mənzillərə daxil olmaq istəyən dəstə üzvlərinin şəxsiyyətlərinin müəyyənləşdirilməsi istiqamətində tədbirlər həyata keçirilir.

“Həmin görüntülərdə qapıları döyənlərin guya qorxuya düşərək qaçmaları və əllərindəki sellofan torbada guya qadınları öldürmək məqsədilə hansısa küt alət gəzdirmələri barədə heç bir kadr yoxdur. Eyni zamanda həmin şəxslərin hansısa evə girərərək dayəni vurub oğurluq etməsi barədə polisə heç bir məlumat daxil olmayıb. Hazırda araşdırma aparılır”- deyə, nazirlikdən bildiriblər.

1news.az

11:59

Sosial şəbəkələrdə gül gətirmək adı ilə mənzillərdən oğurluq edən dəstə üzvlərindən birinin yeni video görüntüsü yayılıb.

1news.az-ın məlumatına görə, kadrlarda əlində gül olan gənc bir oğlanın siması aydın görünür. Mənzillərdən birinin qapısına yaxınlaşan həmin gənc qapının üzərində quraşdırılmış videokameranı görən kimi dərhal liftə minərək oradan uzaqlaşıb.

Qeyd edək ki, son bir neçə gündür ki, sosial şəbəkələrdə Bakıda yeni üsulla evlərə daxil olmağa çalışan oğrular haqqında məlumatlar yer alır. Belə ki, əllərində gül olan bir qrup gənc oğurluq məqsədilə evlərə soxulmağa çalışırlar.

Daxili İşlər Nazirliyi də vətəndaşlara müraciət edərək onları ehtiyatlı olmağa çağırıb.

1news.az