Britaniyalı aktyor Alan Rikman 69 yaşında vəfat edib

Britaniyalı aktyor Alan Rikman bu gün Londonda 69 yaşında vəfat edib.

1news.az-ın AZƏRTAC-a istinadən verdiyi xəbərə görə, aktyorun ölüm xəbərini onun qohumları da təsdiqləyib. Onun son illər xərçəng xəstəliyindən əziyyət çəkdiyi bildirilir.

Qeyd edək ki, A.Rikman bir neçə nəsil tamaşaçının sevimli aktyoru olub. Gənc nəsil onu “Harri Potter” filmindəki professor Severus Sneqq rolu ilə xatırlayır.

Xatırladaq ki, Alan Rikman 1988-ci ildə “Çətin hədəf” filminin ekranlara çıxması ilə məşhurlaşıb. O, həmçinin “Robin Qud: Oğruların şahzadəsi”, “Şüur və hisslər”, “Rasputin”, “Qar piroqu”, “Parfümer. Bir qatilin hekayəti” və bir çox başqa məşhur filmlərdə rol alıb.

Aktyor Venesiya kino festivalında iki mükafat qazanan “Qış qonağı” filmini çəkərək özünü rejissor kimi də sınayıb. Rikman, eyni zamanda, “Qızıl qlobus”, “Emmi”, BAFTA mükafatlarının laureatı olub.

1news.az