Mərkəzi Bank: Mübadilə şöbələri yalnız mehmanxana və hava limanlarında fəaliyyət göstərəcək

Banklar tərəfindən valyuta mübadilə əməliyyatları qanunvericiliyə uyğun olaraq bankların baş ofisində, filial və şöbələrində (o cümlədən mübadilə şöbələrində), eləcə də ödəniş terminallarında həyata keçirilir.

Bu haqda 1news.az-ın sorğusuna cavab olaraq Azərbaycan Mərkəzi Bankından məlumat veriblər.

“Son zamanlar valyuta mübadilə əməliyyatlarının həcminin artması ilə əlaqədar kommersiya bankları tərəfindən əməliyyatların daha səmərəli və çevik tənzimlənməsi, əməliyyatlara nəzarət prosedurunun gücləndirilməsi məqsədilə, eləcə də xidmət şəbəkələrinin və əməliyyat xərclərinin optimallaşdırılması istiqamətində aparılan işlərin davamı olaraq valyuta mübadiləsi əməliyyatlarının mübadilə şöbələrində həyata keçirilməsi məhdudlaşdırılıb, mübadilə şöbələrinin fəaliyyətinə əsasən xitam verilib. 

Bununla belə qeyd olunub ki, Mərkəzi Bank tərəfindən valyutadəyişmə məntəqələrinin bağlanması ilə bağlı heç bir göstəriş verilməyib.

“Hər bir bank valyuta dəyişmə şöbəsi ilə bağlı qərarı qəbul etməkdə sərbəstdir”, - bu haqda 1news.az-a Mərkəzi Bankdan məlumat verilib. 

Mərkəzi Bankdan onu da əlavə etdilər ki, hazırda turizm xidməti göstərən obyektlərdə (xüsusilə mehmanxana və hava limanında) operativ valyuta mübadilə ehtiyaclarının qarşılanması məqsədilə bankların valyuta mübadilə şöbələrinin fəaliyyəti davam etdirilir.

Məlumat üçün bildiririk ki, hazırda əhalinin, o cümlədən sahibkarların bank xidmətlərinə çıxışının təmin edilməsi məqsədilə banklar kifayət qədər geniş xidmət infrastrukturuna malikdirlər. Bankların 914 filial və şöbəsi fəaliyyət göstərir ki, bunların da 458-i regionlarda yerləşir”- deyə, məlumatda qeyd edilib.

1news.az