Qusarda 20 Yanvar şəhidlərinin xatirəsi yad edilib – FOTO

Qusar rayon ictimaiyyəti də 20 yanvar faciəsinin 26-cı ildönümü münasibətilə Şəhidlər xiyabanını ziyarət edib.

1news.az-ın məlumatına görə, daha sonra şəhər Mədəniyyət Evində toplaşan mərasim iştirakçıları 1990-cı il yanvarın 19-dan 20-nə keçən gecə keçmiş sovet ordusunun Bakıda və Azərbaycanın digər şəhər və rayonlarında törətdiyi qırğınlardan danışıblar.

Bu tarixin Azərbaycan xalqının qan yaddaşına yazılan qəhrəmanlıq salnaməsi olduğu bildirilib. Vurğulanıb ki, həmin gecə dinc və günahsız insanların sovet qoşunları tərəfindən amansızlıqla qətlə yetirilməsinə baxmayaraq, bu hadisələr xalqımızın mübarizə əzmini qıra bilməyib.

Çıxışlardan sonra səhnədə Qusar Dövlət Ləzgi Dram Teatrı kollektivinin hazırladığı kompozisiya nümayiş etdirilib.

Saat 12.00-da Qusar şəhəri ərazisində 20 Yanvar şəhidlərinin əziz xatirəsi bir dəqiqəlik sükutla yad olunub, yollarda avtomobillərin hərəkəti dayanıb, səs siqnalları verilib.

1news.az