Romada İŞİD-ə qarşı beynəlxalq koalisiyanın növbəti nazirlər toplantısı keçirilib

Romada İŞİD-ə qarşı beynəlxalq koalisiyanın növbəti nazirlər toplantısı keçirilib. İtaliyanın xarici işlər naziri Paolo Centiloninin və ABŞ-ın dövlət katibi Con Kerrinin həmsədrliyi ilə keçirilən tədbirə 23 ölkədən nümayəndə qatılıb.

Tədbirdə çıxış edən C.Kerri əsasən terrorizmlə mübarizə, Suriya böhranı, İraqda, Liviyada cərəyan edən proseslər, eyni zamanda, miqrasiya və digər problemlərlə bağlı fikirlərini bölüşüb. Vurğulayıb ki, İŞİD-ə qarşı mübarizə bir ölkənin digərinə qarşı müharibə aparmasından daha mürəkkəb və uzunmüddətli olacaq. O deyib: “Biz bu qruplaşma ilə dünyanın hər bir nöqtəsində mübarizə aparmalıyıq. Suriya məsələsinə gəldikdə isə burada vəziyyət getdikcə pisləşir. 13,5 milyon suriyalının humanitar yardıma ehtiyacı var. Onlardan 6 milyonu uşaqlardır”.

İŞİD-ə qarşı mübarizədə İtaliyanın gördüyü işləri yüksək qiymətləndirən ABŞ-ın dövlət katibi Liviyada təhlükəsizlik məsələsinə də toxunub. O, milli birlik hökumətinin yaranması ərəfəsində önəmli təşəbbüslərin həyata keçirilməsinin vacibliyini vurğulayıb.

P.Centiloni çıxış edərək Suriya probleminin həllində əsas hədəfin humanitar fəlakətin qarşısını almaq olduğunu diqqətə çatdırıb. Nazir qeyd edib ki, İŞİD artıq İraqın 40 faiz, Suriyanın isə 20 faiz ərazisi üzərində nəzarəti itirib. Lakin Liviyada bu qruplaşmanın təhlükəsi hələ də qalmaqdadır. Məhz bu səbəbdən koalisiya hərbi, iqtisadi və diplomatik baxımdan daha sıx koordinə olunmalıdır.

Tədbirdə xarici işlər nazirlərinin bəyanatı qəbul edilib.

AZƏRTAC