İsveçdə qaçqınlara hücum planlaşdırmaqda şübhəli bilinən 14 nəfər saxlanılıb

Stokholmun cənubunda yerləşən Nyuneshamn şəhərinin asayiş keşikçiləri fevralın 8-də axşam 14 nəfəri saxlayıblar.

1news.az-ın AZƏRTAC-a istinadən verdiyi xəbərə görə, onlar ölkəyə gələn miqrantlara hücum hazırlamaqda şübhəli bilinirlər.

İsveç KİV-ləri xəbər verirlər ki, jurnalistlərin məlumatına görə, gündüz saatlarında polisə Nyuneshamnda gözlənilən iğtişaşlar barədə informasiya daxil olub. Bununla bağlı təxirəsalınmaz tədbirlər görülüb.

Şübhəlilər tutulandan sonra məlum olub ki, onlar ölkəyə gələn miqrantların müvəqqəti yerləşdirildiyi çadır düşərgəsinə hücum planlaşdırıblar. Yoxlama zamanı bir neçə ədəd silah aşkar edilib. Hazırda polis araşdırma aparır.

Qeyd edək ki, son vaxtlar İsveçdə qaçqınlara və onların müvəqqəti yaşayış yerlərinə hücumlar artıb. Ötən il Krallıq 164 min qaçqın qəbul edib. Nəticədə qaçqın düşərgələrinə hücumların sayı kəskin artıb. Təkcə 2015-ci ilin son altı ayı ərzində 30-dan çox belə mərkəz yandırılıb.

1news.az