Ankarada güclü partlayış olub: 20-dən çox adam ölüb, xeyli yaralı var

Türkiyənin paytaxtı Ankaranın mərkəzində güclü partlayış baş verib.

1news.az-ın Türkiyənin “Hürriyet” qəzetinə istinadən verdiyi xəbərə görə, terror aktı axşam saatlarında hərbi nəqliyyat vasitələri keçərkən törədilib.

İlkin versiyaya görə, küçədə saxlanılan avtomobildə partlayıcı qurğu işə salınıb. Nəticədə oradan keçən iki hərbi avtomobil yanmağa başlayıb.

Ankara Valiliyinin son açıqlamasına görə, hadisə nəticəsində 20-dən çox adam ölüb, xeyli sayda yaralı var. Yaralılar dərhal xəstəxanalara yerləşdiriliblər.

Ölənlərin sayının artacağı istisna edilmir.

Hadisə yerinə çoxlu sayda təcili tibbi yardım və yanğınsöndürən maşınlar cəlb olunub.

Terrorçuların tutulması yönündə tədbirlər görülür.

1news.az