Stokholmda Türk Mədəniyyət Mərkəzində partlayış baş verib - FOTO

Stokholmdan 17 kilometr uzaqlıqda yerləşən Botşirka bələdiyyəsi ərazində yerləşən Türk Mədəniyyət Mərkəzinə məxsus binada partlayış baş verib. Hadisə nəticəsində ölən və ya xəsarət alan olmayıb.

1news.az-ın verdiyi xəbərə görə, bu barədə məlumatı İsveç KİV-ləri yayıb.

İlkin məlumatlara görə, hadisə axşam saat 21:35 radələrində mərkəzin boş olduğu vaxtda baş verib. Partlayış nəticəsində binaya ziyan dəyib. Mərkəzin şüşələri sınıb, binadan tüstünün yayıldığı bildirilir.

Hazırda yerli təhlükəsizlik orqanlarının əməkdaşları, istehkam qrupu və yanğınsöndürənlər hadisə yerində yoxlamalar aparırlar.

Hadisə şahidlərinin sözlərinə görə, axşam saatlarında bir qrup şəxs binaya yaxınlaşaraq əllərindəki maddələri Mədəniyyət Mərkəzinin pəncərələrinə atıb. Bundan sonra isə partlayış baş verib.

Yerli polisin məlumatına görə, hadisə isə bağlı cinayət işi açılıb, partlayışın digər hadisələrlə əlaqəli olub-olmaması araşdırılır.

1news.az