Milli Məclisdə mərc oyunlarına nəzarət funksiyaları müzakirə olunub
“Millət vəkillərinin etirazları nəzərə alınaraq Azərbaycanda mərc oyunlarından əldə olunan gəlirlərin böyük hissəsinə nəzarət Gənclər və İdman Nazirliyində qalacaq”.
1news.az-ın məlumatına görə, bu barədə “Bədən tərbiyəsi və idman haqqında” qanuna dəyişikliklər edilməsi barədə qanun layihəsi haqqında məlumat verən Milli Məclisin Gənclər və İdman Komitəsinin sədri Fuad Muradov deyib.
Qeyd edək ki, ötən gün parlamentin Gənclər və İdman Komitəsinin iclasında “Bədən tərbiyəsi və idman haqqında” qanuna dəyişikliklər edilməsi barədə qanun layihəsinin müzakirəsi aparılıb. Müzakirələr zamanı idman mərc oyunlarına nəzarət funksiyasının Maliyyə Bazarlarına Nəzarət Palatasına verilməsi təklif olunub. Lakin bəzi millət vəkilləri buna etiraz ediblər.
“Millət vəkillərinin etirazları nəzərə alınaraq parlament rəhbərliyinə müraciət olunub. Parlament rəhbərliyi də öz növbəsində qanunvericilik təşəbbüsü subyektinə müraciət edib və məsələ əvvəlki kimi qalıb. Yəni, oyunlardan əldə olunan gəlirlərin böyük hissəsinə nəzarət nazirliyin, az qismi isə Maliyyə Bazarlarına Nəzarət Palatasının verilib”- deyə, F.Muradov qeyd edib.
1news.az
