Gürcüstan prezidentinin Azərbaycana səfəri gözlənilir

Gürcüstan prezidenti Giorgi Marqvelaşvilinin Azərbaycana səfəri planlaşdırılır.

1news.az-ın verdiyi xəbərə görə, bu haqda Azərbaycanın XİN rəhbəri Elmar Məmmədyarovla birgə mətbuat konfransı zamanı gürcü həmkarı Mixeil Canaladze bəyan edib. 

Onun sözlərinə görə, Azərbaycanın XİN rəhbəri ilə görüş çərçivəsində əməkdaşlığın dərinləşməsi məsələləri, eləcə də Bakı-Tbilisi-Qars dəmir yolu layihəsinin həyata keçirilməsi məsələsi də müzakirə olunub.

“Bakı-Tbilisi-Qars dəmir yolu layihəsinin həyata keçirilməsi Asiya ilə Avropa arasında yeni yollar açacaq”, - o, bildirib. 

Həmçinin nazir yaxın zamanlarda Azərbaycanla qaz üzrə əldə edilən razılaşmaları da müsbət qiymətləndirib:

 “Azərbaycan tərəfi ilə ölkədən əlavə qaz tədarükü ilə bağlı razılaşma bu problemin kəsirini həll edəcək”. 

“Bu il ilk strateji layihə olan Bakı-Supsa layihəsinin 20 illiyini qeyd edəcəyik. Bu layihə digər strateji layihələrin əsasını təşkil edib”, - o, qeyd edib.

Nazir qeyd edib ki, Azərbaycanla Gürcüstan ərazi bütövlüyü sahəsində hər zaman bir-birinə hörmətlə yanaşır.

M.Canaladze həmçinin iki ölkə arasında sərhəd bölüşdürülmsəi məsələsinin tezliklə nizamlanacağına ümid etdiyini bildirib:

“Ümid edirik ki, gələn görüş zamanı sərhədin bölüşdürülməsi məsələsi öz həllini tapacaq”.

Qeyd edək ki, Gürcüstanın XİN rəhbəri martın 6-da Azərbaycana rəsmi səfər gəlib.

1news.az