Bank Standard-a müvəqqəti inzibatçılıq təyin edilib
Mayın 3-dən etibarən Bank Standard-a müvəqqəti inzibatçılıq təyin edilib.
1news.az-ın verdiyi xəbərə görə, bu haqda çərşənbə axşamı jurnalistlərlə mətbuat konfransı zamanı Maliyyə Bazarlarına Nəzarət Palatası (MBNP) publik hüquqi şəxsin Direktorlar Şurasının sədri Rüfət Aslanlı bildirib.
Onun sözlərinə görə, banka müvəqqəti inzibatçılıq mayın 2-də MBNP-nın iclasında qəbul edilib.
“Məlumdur ki, Bank Standart son zamanlar çətinliklərlə üzləşirdi. Bu, aktivlərin zəifləməsi, likvidliklə problem və s. idi. Yaranmış vəziyyəti aydınlaşdırmaq üçün Maliyyə Bazarlarına Nəzarət Palatası yoxlamalar aparıb. Nəticədə Bank Standard-ın yaranmış problemi həll etmək üçün lazımi resurslara malik olmaması aydın oldu. Bununla əlaqədar olaraq MBNP banka 3 ay müddətinə müvəqqəti inzibatçılıq təyin etdi. O da bankdakı bütün problemlərlə bağlı məşğul olacaq.
Bundan əlavə, Bank Standard-da müvəqqəti olaraq fiziki və hüquqi şəxslərə əmanətlərin ödənilməsi də dayandırılıb. Bu məhdudiyyət bu gündən etibarən iyunun 3-nə qədər davam edəcək. Yəni əmanətlərin ödənilməsi iyunun 3-dən tam həcmdə qaytarılmağa başlayacaq. Bununla əlaqədar əmanətçilər narahat olmasınlar”.
Həmçinin o, qeyd edib ki, likvidliklə bağlı problemin həll olunması üçün MBNP-nin Mərkəzi Banka (MB) dəstək üçün müraciət edib:
“MB kredit şərtlərinə uyğun olaraq 6 ay müddətinə Bank Standard-a 15 milyon manat kredit ayıracaq”.
R.Aslanlı qeyd edib ki, hazırda Bank Standard-ın sağlamlaşdırılması proqramı hazırlanır ki, bunun hesabına banka dövlət tərəfindən dəstək məqsədilə müəyən vəsait ayırılacaq.
Bundan əlavə, R.Aslanlı bildirdi ki, Bank Standard müflis olmuş bank elan edilməyib və dövlət onun ölkənin ən iri kredit təşkilatına çevrilməsində maraqlıdır.
“Məhz bunun üçün də bankın sağlamlaşdırılması proqramı hazırlanır”.
1news.az
