Opera və Balet Teatrında “Qaraca qız” baletinin premyerası keçiriləcək
Hər il 1 iyun - Uşaqları Beynəlxalq müdafiə günü ərəfəsində Opera və Balet Teatrında kiçik yaşlı tamaşaçılar üçün yeni bir tamaşanın səhnəyə qoyulması artıq bir ənənə şəklini alıb.
1news.az-ın məlumatına görə, bu dəfə də öz ənənəsinə sadiq qalan Teatr uşaqlara Süleyman Sani Axundovun eyniadlı povestinin motivləri əsasında Əşrəf Abbasovun bəstələdiyi “Qaraca qız” baletinin tamaşasını təqdim edəcək.
Balet cəmiyyətdəki ədalətsizliyin, bərabərsizlik və amansızlığın qurbanı olan qəhrəmanın - Qaraca qızın bədbəxt taleyindən, bununla yanaşı onun xeyirxahlığı, sədaqəti, insanlara hədsiz məhəbbətindən bəhs edir.
Tamaşanın quruluşçu baletmeysteri Azərbaycan Respublikasının Əməkdar artisti Samir Səmədov, dirijoru Xalq artisti, professor Cavanşir Cəfərovdur.
Əsas rollarda balet truppasının gənc solistləri - Milli və klassik rəqs üzrə Qəmər Almaszadə adına I beynəlxalq müsabiqənin Qran-pri mükafatının laureatı Cəmilə Kərimova, I mükafatın sahibi Timur Oduşev, Əməkdar artist Alsu Qimadiyeva, solistlərdən Elmira Süleymanova, Səbinə Məmmədova, Səbinə Abdullayeva, Anar Tahirov, Faiq Qubadov və b. çıxış edəcəklər.
1news.az
