UEFA yeni reytinq cədvəlini açıqlayıb
UEFA komandaların yeni reytinq cədvəlini açıqlayıb.
1news.az-ın məlumatına görə, Avropa Liqasının dünən keçirilən qarşılaşmalarında Azərbaycan klubları daha 0,500 xal qazanıb.
Bu yarım xal “Neftçi” və “Qəbələ”nin I təsnifat mərhələsinin ilk oyunlarındakı qələbələri sayəsində gerçəkləşib. Sonuncular evdə Gürcüstan “Samtredia”sını 5:1, bakılılar səfərdə Malta “Baltsan”ını 2:0 hesabı ilə yenib. Bu qələbələrin hərəsi ölkəmizə 0,250 xal qazandırıb.
Bundan öncə Moldova “Daçiya”sını uda bilməyən “Kəpəz”in 0,125 xal əldə etdiyini nəzərə alsaq, cari mövsümün qazancı 0,625 olub. Son 5 mövsümün nəticəsinə görə hesablanan əmsalımız 14,125-ə yüksəlib.
Hazırda Azərbaycan UEFA-nın reytinqində 24-cü pillədə qərarlaşıb.
Siyahıya isə İspaniya başçılıq edir. Sonrakı yerlərdə Almaniya, İngiltərə, İtaliya, Fransa, Portuqaliya, Rusiya, Ukrayna, Belçika qərarlaşıb. İlk onluğu Türkiyə qapayır.
1news.az
