“Qəbələ” Macarıstandan qələbə ilə qayıdır
“Qəbələ” UEFA Avropa Liqasının II təsnifat mərhələsində ilk oyununu keçirib.
1news.az-ın məlumatına görə, “qırmızı-qaralar” səfərdə Macarıstanın MTK klubu ilə üz-üzə gəlib. Bu ölkənin təmsilçisi ilə qarşılaşan ilk Azərbaycan klubu olan “Qəbələ 2:1 hesabı ilə qalib gələrək Avrokuboklarda ilk səfər qələbəsini qazanıb.
MTK ilə cavab oyunu iyulun 21-də Bakıda keçiriləcək.
Qeyd edək ki, Avropa Liqasında ölkəmizi təmsil edən digər klublarımız da dünən meydana çıxıblar. Belə ki, “Neftçi” Bakıda Makedoniyanın “Şkendiya” klubu ilə qolsuz bərabərə qalıb, “Kəpəz” isə Avstriyada “Admira” klubuna minimal hesabla məğlub olub.
MTK (Macarıstan) – “Qəbələ” – 1:2
UEFA Avropa Liqası, II təsnifat mərhələsi, ilk oyun
14 iyul. Saat 22:30. Dyer. “Dyirmot” stadionu
Baş hakim: Boyan Pandjiç (İsveç)
Baş hakimin köməkçiləri: Stefan Hallberq, Maqnus Syoblom (hər ikisi İsveç)
Dördüncü hakim: Mohammed Al-Hakim (İsveç)
Hakim-inspektor: Oğuz Sarvan (Türkiyə)
UEFA nümayəndəsi: Valid İmamoviç (Bosniya və Herseqovina)
Qollar: Şandor Torqelle, 70 // Nika Kvekveskiri, 25, Filip Ozobiç, 63
14-cü dəqiqədə Yozef Konto penaltidən yararlana bilməyib.
Sarı vərəqələr: Daniel Gero, 26, Barnabaş Beşe, 40 // Vojislav Stankoviç, 40
Artırılan vaxt: I hissədə 1 dəq.; II hissədə 2 dəq.
1news.az
