“Zirə” toplanış üçün Türkiyəyə yollandı

Ölkə çempionatının yeni mövsümünün hazırlığını davam etdirən “Zirə” Türkiyəyə yollanıb.

1news.az-ın məlumatına görə, “qartallar” qardaş ölkəyə bu gün səhər saatlarında yola düşüblər.

Qeyd edək ki, iyul ayının 15-də Türkiyədə baş verən məlum hadisələrlə bağlı “Zirə” qardaş ölkədə planlaşdırılan təlim-məşq toplantısına yollana bilməmişdi.

Türkiyədəki vəziyyəti nəzərə alan klub rəhbərliyi hazırlığın Bakıda davam etdirilməsini qərara almışdı. Ancaq qardaş ölkədə hadisələrin səngiməsi, yoxlama oyunları və hazırlıq üçün hava şəraiti baxımından daha əlverişli olan Bolu variantını yenidən gündəmə gətirdi.

Belədə, baş məşqçi Adil Şükürovun istəyi ilə komanda bu gün səhər qardaş ölkəyə yola düşdü. “Qartallar” Bolu toplantısı zamanı iki yoxlama oyununda qüvvəsini sınayacaq. Təlim-məşq toplanışı iyulun 30-dək davam edəcək.

“Zirə” səfərə çıxmamış daha bir yoxlama oyununda qüvvəsini sınadı. Baş məşqçi Adil Şükürov futbolçuları komandamızın əvəzedici heyəti ilə oyunda yoxladı. Mehdi Hüseynzadə adına Sumqayıt şəhər stadionunda keçirilən qarşılaşma qolsuz bərabərliklə başa çatdı.

1news.az