Roman Qriqorçuk: “Lill” üzərindəki qalibiyyətlə fəxr edə bilərik
Bizim üçün vacib oyun idi. Bu cür qələbələr bütün həyatın boyu yadda qalır.
1news.az-ın məlumatına görə, bunu Avropa Liqasının III təsnifat mərhələsinin cavab oyununda minimal hesabla Fransanın “Lill” klubuna qalib gələrək iki oyunun nəticəsinə görə pley-off-a vəsiqə qazanan “Qəbələ”nin baş məşqçisi Roman Qriqorçuk deyib:
“Bu gün stadionda insanlarda qələbə arzusunu görürdüm. Stadiona gəlib bizə səmimi dəstək olan azarkeşləri sevindirmək istədik. Həqiqətən də, çox xoşbəxtəm. Həm klubun, həm ölkənin futbol imici yüksəldi. Bu qələbəni həmişə xatırlayacam. “Lill” üzərindəki qalibiyyətlə fəxr edə bilərik”.
Futbolçularının çıxışından razı qaldığını deyən baş məşqçi hakimlərlə bağlı hər hansı iradının olmadığını da diqqətə çatdırıb.
R.Qriqorçuk Azərbaycan çempionatında legioner limitinin olması ilə bağlı da fikirlərini bölüşüb:
“Azərbaycan çempionatındakı legioner limitinə görə təəccüblənirəm. Bununla heç kimi tənqid etmək istəmirəm. Amma mənim fikrimcə, legioner məsələsində limit olmamalıdı. Limitin olmasının yığmaya, klublara heç bir xeyri yoxdu. Hətta deyərdim ki, bu, bizə mane olur. Limitin aradan qaldırılması klublara qənaət də gətirə bilər. Heyətdə güclülər yer almalı, zəiflər kənarda qalmalıdır”.
1news.az
