Həsən Ruhani: “Təhdidlərlə qarşı üçtərəfli anlaşma vacibdir”

“Ölkələrimiz tərəfindən atılan addımlar üç dövlətin regional əməkdaşlığa yönələn dialoquna zəmin yaradır”.

1news.az xəbər verir ki, bunu İran prezidenti Həsən Ruhani Bakıda keçirilən Azərbaycan, İran və Rusiya prezidentlərinin üçtərəfli görüşündə deyib.

O bildirib ki, İran xarici siyasət prinsiplərinə uyğun olaraq qonşuları ilə münasibətlərin inkişafına önəm verir:

“Bu kimi üçtərəfli format, İran Azərbaycan və Rusiya arasında bu münasibətlər fikir mübadiləsinə, ortaq mənafelərin meydana çıxmasına imkan yaradır. İran bu ideyanı dəyərləndirir. Belə bir formatın yaranması regionun hazırkı durumunda üç ölkə arasında əlaqələrin genişləndirilməsi və dərinləşdirilməsi üçün son dərəcə əhəmiyyətlidir”.

H.Ruhani deyib ki, bu üç ölkə ortaq geosiyasi mövqeyə malikdir, eyni fürsətlər və təhdidlərlə qarşılaşır və bu təhdidlər müştərək anlaşmanı daha da vacib edir:

“İran hesab edir ki, dünyanın indiki vəziyyətində bir ölkə müxtəlif təhdidlərə qarşı təkbaşına mübarizə aparmağı bacarmayacaq. Hər ölkənin rifahı üçün əməkdaşlığın olması vacibdir. İranın xarici siyasəti başqa ölkələrlə əməkdaşlıq və tərəfdaşlıq, qarşılıqlı maraqlar çərçivəsində münasibətlər qurmağa əsaslanır. Biz bu sahədə danışıqların faydalı olduğunu hesab edirik”.

1news.az