Azərbaycanlı atlet dünya rekordunu qıraraq Olimpiya qızılını qazandı

Braziliyanın Rio-de-Janeyro şəhərində keçirilən Yay Olimpiya Oyunları davam edir.

1news.az-ın məlumatına görə, Qazaxıstan yığmasının şərəfini qoruyan azərbaycanlı idmançı Nicat Rəhimov Rio Yay Olimpiya Oyunlarında ağırlıqqaldırma üzrə qızıl medal qazanıb.

Belə ki, ümumi nəticədə 379 kq çəkinin öhdəsindən gələn həmyerlimiz qızıl medal qazanmaqla yanaşı, təkanla qaldırmada 214 kq-lıq nəticə ilə yeni dünya rekordu müəyyən edib. Bu, həm də Qazaxıstanın Rioda qazandığı ilk medalı olub.

Rioda bu çəkidə ikinci yeri Siaoyun (177 kq + 202 kq = 379 kq), üçüncü yeri misirli Youssef Mahmud (165 kq + 196 kq = 361 kq) tutub.

Qeyd edək ki, N.Rəhimov Azərbaycanda anadan olub. O, 2010-cu ildə ölkəmizə Sinqapur Yay Olimpiya Oyunlarının qızıl medalını qazandırmaqla yanaşı, həmin ildə Avropa çempionu tituluna da yiyələnib. 

2014-cü ildə Azərbaycan yığmasından imtina edən 23 yaşlı idmançı Qazaxıstan vətəndaşlığını seçərək bu ölkənin şərəfini qorumağa başlayıb.

1news.az