700 bal toplayan tələbələrdən üç nəfəri BANM-i seçib - FOTO
2016/2017-cı tədris ili üçün I ixtisas qrupları üzrə ali təhsil müəssisələrinə keçirilmiş qəbul imtahanında ən yüksək nəticə hesab olunan 700 balı toplayan üç tələbənin hər üçü Bakı Ali Neft Məktəbini (BANM) seçiblər.
1news.az-a BANM-dan verilən xəbərə görə, I ixtisas qrupları üzrə ən yüksək nəticə göstərən Tural Ağayev, Rəvan Nəzərəliyev və Nadir Sultanlı Bakı Ali Neft Məktəbini seçərək, “Proseslərin avtomatlaşdırılması mühəndisliyi” ixtisası üzrə ali təhsillərini davam etdirəcəklər.
Qeyd edək ki, Tural Ağayev Türkiyə Diyanət Vəqfi Bakı Türk Liseyinin məzunudur, əslən Zəngilan rayonundandır. Turalın anası evdar qadın, atası isə fəhlədir.
Rəvan Nəzərəliyev Xırdalandakı 5 saylı tam orta məktəbi bitirib. Rəvanın atası maşın ustası, anası riyaziyyat müəlliməsidir. Həmçinin, Rəvan ailədə yüksək bal toplayan ilk uşaq deyil. Digər qardaşları Rəşad Nəzrəliyev 2013/2014-cü tədris ili üzrə keçirilən qəbul imtahanında 677 bal toplayıb və builki qəbul imtahanında isə Nurlan Nəzərəliyev isə 685 bal toplayaraq BANM-ə qəbul olublar.
Nadir Sultanlı Ankara məktəb-liseyinin məzunudur. Nadirin anası evdar qadındır, atası isə BP-də işləyir.
1news.az
