Azərbaycan atleti Paralimpiya oyunlarında finala vəsiqə qazanıb

Braziliyanın Rio-de-Janeyro şəhərində keçirilən XV Yay Paralimpiya Oyunları davam edir.

1news.az xəbər verir ki, yarışın beşinci günündə Azərbaycan üzgüçüsü Roman Saley finala yüksəlib.

Belə ki, 400 metr məsafəyə sərbəst üsulla üzmə yarışlarında iştirak edən Azərbaycan atleti təsnifat mərhələsində ilk səkkizlikdə yer alıb.

On üç atletin qatıldığı təsnifat mərhələsində R.Saley ikinci qrupda mübarizə aparıb. İdmançımız məsafəni 4:13,83 saniyəyə qət edərək qrupda üçüncü, ümumi nəticədə isə 4-cü olub.

Qeyd edək ki, final yarışı sentyabrın 13-də keçiriləcək.

1news.az