Futbol

Kapitan “Qarabağ”ı məğlubiyyətdən xilas etdi, “Qəbələ” səfərdə uduzdu - VİDEO

10:25 - 16 / 09 / 2016

Dünən keçirilən oyunlarla Avropa Liqasında qrup mərhələsinə start verilib.

1news.az-ın məlumatına görə, turnirdə ölkəmizi təmsil edən “Qarabağ”la “Qəbələ” ilk oyunlarına çıxıblar.

Ardıcıl üçüncü dəfə Çempionlar Liqasında mübarizəni dayandırıb, daha aşağı səviyyəli turnirdə mübarizə edən Ağdam klubu Çexiya təmsilçisi “Slovan”ı qəbul edib.

Görüşə fəal başlayan qonaqlar Yan Sikoranın 10-cu saniyədə vurduğu qolla elə ilk dəqiqədəcə hesabı açıblar. Lakin qonaqların sevinci uzun çəkməyib. Cəmi 7 dəqiqə sonra künc zərbəsindən Daninin ötürməsini başla qapıya yönəldən Miçel hesabı bərabərləşdirib.

Oyununun ikinci hissəsində ilk sevinən tərəf “Slovan”lı futbolçular olub. 67-ci dəqiqədə veteran Milan Baroşun qolu ilə qonaqlar yenidən hesabda irəli çıxıblar.

Oyuna əlavə edilən sonuncu dəqiqədə “Qarabağ”ın kapitanı Rəşad Sadıqov hesabı bərabərləşdirərək komandasını məğlubiyyətdən xilas edib.

Ağdam təmsilçisindən fərqli olaraq “Qəbələ” ilk matçını səfərdə keçirib. “Anderlext”ə qonaq olan “qırmızı-qaralar” xal üçün mübarizə aparsalar da buna nail olmayıblar.

Görüşdə hesabı qonaqlar açıb. Oyunun 14-cü dəqiqəsində Teodorşuk komandasını irəli çıxarıb. Qoldan sonra irəli atılan komandamız hesabı bərabərləşdirmək üçün ilk cəhdindəcə buna nail olub. Baqali Dabo 20-ci dəqiqədə status-kvonu bərpa edib.

Ancaq ilk hissənin sonuna 4 dəqiqə qalmış rəqib yenidən önə keçib. Rafael Santos avtoqol müəllifi olub. İlk hissə bu hesabla başa çatıb.

İkinci hissədə daha bir dəfə fərqlənən ev sahibləri 3:1 hesablı qələbəyə seviniblər.

Avropa Liqası

Qrup mərhələsi. I tur

15 sentyabr

“Qarabağ” – “Slovan” (Çexiya) - 2:2

Qollar: Miçel, 7, Rəşad Sadıqov, 90+4 - Yan Sikora, 1, Baroş, 68

Hakimlər: Stefan Klossner, Raffael Zeder, Jan-Yves Viçt, Yohannes Voqel

Əlavə köməkçi hakimlər: Alain Bieri, Saşa Amhof (hamısı İsveçrə)

Hakim-İnspektor: Vladimir Antonov (Moldova)

UEFA nümayəndəsi: Pavel Kolev (Bolqarıstan)

“Dalğa Arena”