SOCAR UPSTREAM BANM-in tələbələrini mükafatlandırdı
Bakı Ali Neft Məktəbinin (BANM) Neft-qaz mühəndisliyi ixtisası üzrə III və IV kursda təhsil alan 7 tələbəsinin “SOCAR UPSTREAM Management International MMC” şirkəti tərəfindən sertifikat və mükafatlara layiq görülməsinə həsr edilmiş tədbir keçirilib.
1news.az-a BANM-dan verilən xəbərə görə, tədbirdə çıxış edən BANM-in rektoru Elmar Qasımov “SOCAR UPSTREAM Management International MMC”-də bu ilin yayında istehsalat təcrübəsində olmuş tələbələrə yaradılan şəraitdən söz açmış, onların yüksək səviyyəli bilik və bacarıq nümayiş etdirdiklərini bildirmişdir.
E.Qasımov bütün beynəlxalq şirkətlərlə, o cümlədən SOCAR və onun müəssisələri ilə əməkdaşlıq çərçivəsində hər il BANM-in tələbələrinin istehsalat təcrübəsi keçmək üçün müxtəlif müəssisələrə göndərildiklərini, həm ödənişsiz, həm də ödənişli əsaslarla təcrübə keçən tələbələr üçün yaradılan şəraitdən razı qaldığını ifadə edib.
BANM-in məzunlarının yüksək ixtisaslı, ingilisdilli mütəxəssis kadrlar kimi formalaşmasında onların Ali Məktəbin professor-müəllim heyəti tərəfindən verilən yüksək səviyyəli tədris nəticəsində qazandıqları biliklərlə yanaşı, şirkətlərdə əldə etdikləri təcrübənin də vacibliyini deyən rektor ''SOCAR UPSTREAM Management International MMC'' şirkətinin rəhbərliyinə təşəkkür edib.
SOCAR-ın vitse-prezidenti, ''SOCAR UPSTREAM Management International MMC'' şirkətinin icraçı direktoru Yaşar Lətifov BANM-in hazırda ölkəmizdə ən nüfuzlu ali təhsil müəssisələrindən biri olduğunu söyləmiş, Ali Məktəbin tələbələrinin istehsalat təcrübəsi zamanı nümunəvi davranış və öz peşələrinə böyük maraq göstərdiklərini bildirib.
1news.az
