Məktəbəhazırlıq qruplarına maraq artır – VİDEO
Məktəbəhazırlıq qrupu adından da göründüyü kimi məktəbə hazırlığın ilkin mərhələsidir. İlk olaraq Bakıda pilot layihəsi kimi həyata keçirilən məktəbəhazırlıq qrupu bu ildən etibarən dövlət vəsaiti hesabına respublika üzrə təşkil olunur.
Təhsil Nazirliyinin məktəbəqədər təhsil sektorunun müdiri Nərminə Alnağıyeva bildirib ki, məktəbəhazırlıq qrupları adətən məktəbəqədər təhsil müəssisələrində təşkil olunmaqla 5 yaşında olan uşaqları əhatə edir:
“Lakin hazırda 5 yaşlı uşaqları bütünlüklə məktəbəqədər təhsil müəssisələrinə cəlb etmək mümkün deyil. Çünki bu cür müəssisələrin sayı azdır. Ona görə iki il bundan əvvəl pilot layihəsi çərçivəsində ilk olaraq Bakıdakı ümumtəhsil məktəblərində məktəbəhazırlıq qrupları təşkil olundu”.
Nəzərinizə çatdıraq ki, keçən iki il müddətində məktəbəhazırlıq qruplarına gələn uşaqların sayı xeyli artıb. Belə ki, ötən il ölkə üzrə 4442 uşaq məktəbəqədər hazırlıq qruplarından bəhrələnib.
N.Alnağıyevanın sözlərinə görə, məktəbəhazırlıq qruplarına gələn uşaqlar həftədə 4 gün məşğul olacaqlar. Hər bir məşğəıə 30 dəqiqə olmaqla gün ərzində 3 məşğələ nəzərdə tutulub. Məşğələlər arasında isə 10 dəqiqə fasilə olacaq.
Uşaqlar hazırlıq kurslarında ətraf mühitlə tanış olmaqla yanaşı, məntiqi və riyazi təfəkkürün inkişafı üçün tapşırıqlar yerinə yetirəcək, hərflərlə tanış olacaqlar. Bundan başqa uşaqlarla təsviri fəaliyyət, fiziki mədəniyyət, bədii təfəkkürün inkişafı istiqamətində də iş aparılacaq. Xüsusi diqqət yetirilən istiqamətlərdən biri nitq mədəniyyətinin inkişafı ilə bağlı olacaq.
Qeyd edək ki, məktəbəhazırlıq qrupları valideynlərə bir sıra üstünlüklər verəcək:
- Kurslar dövlət vəsaiti hesabına keçirildiyindən valideynlər büdcələrinə qənaət etmiş olacaqlar.
- Uşaqlar məktəbəhazırlıq kursunu bitiridikdən sonra orta məktəbdə yüksək psixoloji hazırlıqları ilə fərqlənirlər.
- Məktəb 5 yaşından hazırladığı uşaq haqda o hələ orta məktəbə getməzdən əvvəl məlumatlı olur.
Onu da bildirək ki, Təhsilin İnkişafı üzrə Dövlət Strategiyasında hədəf olaraq erkən yaşlı uşaqların məktəbəqədər təhsillə əhatəsinin 90 faiz səviyyəsinə çatdırılması götürülüb.
1news.az
