Yol polisi vaxtı bitmiş sürücülük vəsiqələrinin dəyişdirilməsi məsələsinə aydınlıq gətirib

Yol polisi sürücülərin vaxtı bitmiş sürücülük vəsiqələrini dəyişdirərkən həm mexaniki, həm də avtomat sürət qutusu olan avtomobilləri idarə etmək hüququnun olub-olmayacağına aydınlıq gətirib.

1news.az-ın verdiyi xəbərə görə, bu barədə Azərbaycan Respublikası Baş Dövlət Yol Polisi İdarəsindən bildiriblər:

“İlin əvvəlində praktiki idarəetmə üzrə imtahan verənlər arasında ilk dəfə sürücülük vəsiqəsi alan şəxslərdən mexaniki və ya avtomat sürət qutusu olan avtomobildə imtahan vermək istədikləri soruşulur. 

Müvafiq olaraq “avtomat”da imtahan verən sürücüyə verilən vəsiqədə onun yalnız avtomat sürət qutusu olan avtomobili idarə etmə hüququ olduğu qeyd edilir. “Mexaniki” sürət qutusu olan avtomobil üzrə imtahan verən sürücü isə yalnız həm mexaniki, həm də avtomat sürət qutusu olan avtomobili idarə etmək hüququna malikdir”. 

İdarədən onu da vurğulayıblar ki, bu ilə qədər bu qayda tətbiq edilmirdi:

“Vaxtı bitmiş vəsiqələri dəyişərkən alınan yeni vəsiqələr sürücülərə həm avtomat, həm də mexaniki sürətlər qutusu olan avtomobilləri idarə etmək hüququnu verir. Belə ki, daha öncə bütün imtahanlar mexaniki sürət qutusu olan avtomobil ilə götürülürdü”.

Qeyd edək ki, yeni qaydalar, köhnə qaydalardan fərqlənmir, sadəcə bir qeyd var, avtomat və ya mexaniki sürət qutusu. Vaxtı bitmiş sürücülük vəsiqələrinin dəyişdirilməsi həm Azərbaycan Respublikası Baş Dövlət Yol Polisi İdarəsinin binasında, eləcə də “ASAN xidmət” mərkəzlərində aparılır.

1news.az